Համաներմամբ ազատ է արձակվել վարորդ Հրաչյա Հարությունյանը

Ռուսաստանում դատապարտված և պատիժը կրելու համար Հայաստան տեղափոխված հայ վարորդ Հրաչյա Հարությունյանը համաներմամբ ազատ է արձակվել: Այս մասին ԼՈւՐԵՐ.com-ի հետ զրույցում ասաց Հրաչյա Հարությունյանը:

Նա նշեց, որ 2018 թ.-ի հուլիսից իր խափանման միջոցը փոխվել էր, պատիժը կրում էր բաց ռեժիմով, սակայն համաներումն իր վրա էլ ազդեց. «Հուլիսից պատիժս կրում էի բաց ռեժիմով, ամեն օր գնում ստորագրում էի: Հիմա համաներումն ազդեց ինձ վրա, ուղիղ 5 տարին լրացավ ու ազատ արձակեցին»,- ասաց նա։

Հարությունյանն ասաց շատ ուրախ է և պատրաստվում է աշխատել, քանի որ կյանքից հետ է ընկել:

Հիշեցնենք, որ 2013թ. հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղևորատար ավտոբուսին, ինչի հետևանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Հրաչյա Հարությունյանը Ռուսաստանում 6 տարի 9 ամիս ժամկետով ազատազրկման էր դատապարտվել: 2017թ. հուլիսի 20-ին Հրաչյա Հարությունյանը տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը Հայաստանում կրելու համար:

Նշենք, որ համաներում հայտարարելու մասին օրենքն ուժի մեջ է մտել այսօր և արդեն սկսել է ՔԿՀ-ներից դատապարտյալներին ազատ արձակելու գործընթացը: Համաներմամբ ժամը 18:00-ի դրությամբ ազատ է արձակվել 234 դատապարտյալ:

Սոնա Հարությունյան