Ամենայն Հայոց Կաթողիկոսն ընդունել է ՀՀ-ում Շվեդիայի Թագավորության նորանշանակ դեսպանին

Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում նոյեմբերի 6-ին ընդունել է Հայաստանի Հանրապետությունում Շվեդիայի Թագավորության նորանշանակ արտակարգ և լիազոր դեսպան Ուլրիկ Թիդեստրոմին: Ինչպես տեղեկացրին Մայր Աթոռի Տեղեկատվական համակարգից, Ամենայն Հայոց Կաթողիկոսը նշանակման առիթով շնորհավորել է պարոն Ուլրիկ Թիդեստրոմին՝ բերելով իր բարեմաղթանքները: 

Վեհափառ Հայրապետն ուրախությամբ արձանագրել է, որ երկու երկրների միջև փոխհարաբերությունները նոր ընթացք և զարգացում են ստանում: Այդ առիթով Ամենայն Հայոց Կաթողիկոսը հույս հայտնել է, որ Շվեդիայի հայ համայնքն ամուր կամուրջ կհանդիսանա երկու ժողովուրդների կապերի առավել խորացման և ամրապնդման գործում: Գարեգին Բ Կաթողիկոսն իր գնահատանքն է արտահայտել Շվեդիայի իշխանություններին հայ համայնքի հանդեպ ցուցաբերվող հոգատար վերաբերմունքի համար, ի մասնավորի Մերձավոր Արևելքից այդ երկիր ապաստան գտած հայորդիների հանդեպ: 

Շվեդիայի դեսպանը նույնպես հաստատել է, որ իր կառավարությունն օգնություն է ցուցաբերում երկրում ապաստանած տարբեր համայնքների ներկայացուցիչներին, այդ թվում նաև հայերին: Դեսպան Ուլրիկ Թիդեստրոմը նաև հետաքրքրվել է տարբեր ոլորտներում Հայ Եկեղեցու գործունեությամբ: 
Վերջում Ամենայն Հայոց Կաթողիկոսն արդյունավոր առաքելություն մաղթեց դեսպանին՝ ի զորացումն հայ-շվեդական կապերի:

Հանդիպմանը ներկա է գտնվել Մայր Աթոռի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը: