Տեսնում էր, բայց լռում. մարզպետի ինքնախոստովանանքը...
Վերլուծական
Արարատի մարզպետ Գարիկ Սարգսյանն, անդրադառնալով նախկին վարչապետ Հովիկ Աբրահամյանի ընտանիքին պատկանող` ապօրինի ջրագծերի եւ ստվերային այգիներ հայտնաբերելու գործին՝ հայտարարել է, թե բոլորը տեսնում էին այդ այգիները, բոլորը դրա մասին գիտեին, խոսում էին, մնում էր միայն փաստաթղթավորել այդ ամենը, խախտումը հայտնաբերել, լուսաբանել եւ վերջակետ դնել:
Իրականում այդ բոլորի մեջ մտնում էր նաև ինքը՝ Գարիկ Սարգսյանը: Լինելով ընդդիմադիր գյուղապետ՝ նա պետք է որ շահագրգռված լիներ տեսածը մատնացույց անելու, խնդիրը հանրայնացնելու և հենց այն ժամանակ փաստաթղթավորելու ու վերջակետ դնելու հարցում: Բայց արի ու տես՝ չի արել: Այդ հիմա է, որ Սարգսյանը ոչնչից չի վախենում, չի կաշկանդվում, դեռ մի բան էլ՝ բացահայտումները ներկայացնում է իբրև իր ձեռքբերումներից մեկը: Իրականում, այս բացահայտումները հեղափոխության ձեռքբերումն են, քանի որ եթե չլիներ թավշյա հեղափոխությունը Սարգսյանը դեռևս դիտորդի կարգավիճակով հետևելու էր Հովիկ Աբրահամյանի և նախկին քրեաօլիգարխիկ համակարգի մյուս կարկառուն ներկայացուցիչների ապօրինություններին:
Հիմա, երբ իրավիճակ է փոխվել, իշխանություն է փոխվել՝ շատ հեշտ է դիմել նման հռետորաբանությանը: Իսկ իրականում, եթե կուզեք՝ հենց նման ընդդիմադիրների դիտորդի կարգավիճակն էր նախկին իշխանություններին թևութիկունք տալիս՝ շարունակելու իրենց ապօրինությունները: Հիմա մարզպետի կարգավիճակով կարելի է հայտարարել՝ թող ապացուցեն՝ ունե՞ն ռեյտինգ, թե՞ փուչիկ էր: Իրականում, գուցե և փուչիկ էր, սակայն հենց նման կողմնակի դիտորդների կողմից փչված փուչիկ… Հայտնի քաղաքական ասացվածք կա՝ վատ քաղաքական գործիչներին ընտրում են ընտրություններին չմասնակցող «լավ» քաղաքացիները: Այս դեպքում տեղին է ասել՝ վատ քաղաքական գործիչները ապօրինություններ են գործում կողմնակի դիտորդի դեր ստանձնած «լավ» քաղաքացիների «թույլտվությամբ»:
ՈՒՂԻՂ ԵԹԵՐ
Ամենադիտված 
«Մարինան նույնպես չկարողացավ հաղթել այդ չարիքին». Իրինա Թովմասյանը ցավալի լուր է հայտնել
