Հիմնանորոգված կամուրջն անվերջ նորոգվում է. աշտարակցիները բողոքում են

Աշտարակի մի խումբ բնակիչներ բողոքում են, որ Հյուսիս-հարավի՝ Աշտարակի կամրջի հատվածում ժամանակ առ ժամանակ իրականացվող վերանորոգումները ոչ միայն հիասթափեցրել, այլ «զզվեցրել են տարածաշրջանի բնակիչներին»: 

Արամ Կարապետյանը մի խումբ աշտարակցիների կողմից մեր խմբագրություն նամակ է ուղարկել, որում ասում է, թե հիմնանորոգված կամուրջն անվերջ նորոգվում է. «Ինչո՞ւ այնպես չի արվում, որ շինարարների անփությույան պատճառով չդադարեցվի երթևեկությունը: Իսկ  վարոդներին ո՞վ է փոխհատուցելու: Բոլոր նրանք, ովքեր ցանկանում են իրենց ալեկոծվող ծովում զգալ, կարող են երթևեկել Երևան–Աշտարակ կամրջով: Մի խորհուրդ էլ ճանապարհի այդ հատվածով անցնողներին՝ ուշադի՛ր եղեք, մի՛ գերազանցեք արագությունը, այլապես ալիքները ձեզ ափ կնետեն»,-Ընդգծել է Արամ Կարապետյանը մեզ ուղարկած նամակում:

Կարապետյանը նաև բողոքում է, թե ո՞ւր մնացին նոր կառավարության խոստումները և ինչո՞ւ պատասխանատվության չեն ենթարկվում իրենց աշխատանքում թերացողները, ինչո՞ւ են մարդիկ այսօր էլ ստիպված ժամանակ վատնում ու նյարդեր քայքայում անբարեխիղճ ճանապարհաշինարարների պատճառով:

Խնդրի վերաբերյալ մենք զրուցեցինք Տրանսպորատային ծրագրերի իրականացման կազմակերպության հանրային կապերի և տեղեկատվության մասնագետ Լիլիթ Գրիգորյանի հետ, ով մեր հեռախոսազանգից անմիջապես հետո կապ հաստատեց կապալառուի հետ՝ պարզելու խնդրի մանրամասները: 

Գրիգորյանն, այնուհետև, ԼՈՒՐԵՐ.com-ին փոխանցեց, որ Հյուսիս-հարավ ճանապարհային միջանցքի նշված հատվածում շինարարական աշխատանքներ իրականացնող կապալառու կազմակերպության ներկայացուցիչները (Կորսան Կորվիամ Կոնստրուկսյոն Էս Ա) տեղեկացրել են, որ այս պահին Աշտարակի կամրջի վրա որևէ շինարարական աշխատանք չի իրականացվում։

«Նշված կամրջի վրա կապալառուի միջոցներով թերությունների վերացման աշխատանքներ են իրականացվել մոտ 1,5 ամիս առաջ»,-ընդգծեց Լիլիթ Գրիգորյանը։

Հավելենք, որ աշտարակցիները նամակին կից փոխանցել են նաև լուսանկարներ, որոնք ներայացնում ենք ստորև: 

 Արմինե Միքայելյան