ՀՀ-ում հանցագործությունների թիվն աճել է 1723-ով

Փաստաբան Նորայր Նորիկյանը ֆեյսբուքյան իր էջում գրել է․

«ՀՀ Վիճակագրական կոմիտեն հրապարակել է 2018թ. հունվար-սեպտեմբեր ամիսներին ՀՀ-ում կատարված իրավախախտումների տվյալները:

Ըստ այդմ, 2018թ. նշված ժամանակահատվածում արձանագրվել է 16277 իրավախախտում՝ 1723-ով ավելին, քան 2017թ. նույն ժամանակահատվածում:
1335 դեպքով ավելացել են միջին ծանության, 629-ով՝ ծանր հնացագործությունների, 22-ով՝ առանձնապես ծանր հանցագործությունների թիվը,

Նվազել են սպանությունների, սպանության փորձերի և դիտավորությամբ առողջությանը վնաս պատճառելու դեպքերը:
Աննշան աճել է բռնաբարության և բռնաբարության փորձերի թիվը:
Դրան հակառակ, 48-ով նվազել է հրազեն, ռազմամթերք պատրաստելու և ապօրինի շրջանառության դեպքերը:

290 դեպքով ավելացել են ճանապարհային երթևեկության և տրանսպորտային միջոցների շահագործման կանոնների խախտման դեպքերը, 32-ով ավելացել են մահվան ելքերը, ինչը
լրջորեն մտահոգվելու տեղիք է տալիս:

186 դեպքով նվազել է թմրամիջոցների հետ կապված հանցագործություննեի թիվը:
16 դեպքով ավելացել է խուլիգանությունների թիվը:

Ռեկորդային աճ է գրանցվել պետական կամ հանրային գույքի հափշտակությունների ոլորտում: Գրանցվել է 432 դեպք՝ 347-ով ավելի, քան նախորդ տարի:

618 դեպքով աճել են անձնական գույքի հափշտակությունների թիվը, մասնավորապես՝ գողությունների, վատնումների, յուրացումների:
332 դեպքով ավելացել բնակարանային գողությունների թիվը:

Շուրջ 462 դեպքով ավելացել են պետական իշխանության, ծառայության և կառավարման կարգի դեմ ուղղված հանցագործությունների թիվը, մասնավորապես՝ 2017թ. արձանագրված 120 դեպքի համեմատ, 2018թ. 286 դեպքով ավելացել է կաշառք ստանալու, տալու և կաշառքի միջնորդության դեպքերը, ընդհանուրը՝ 406 դեպք:

Ամենաշատ հանցագործությունները կատարվել են Երևան քաղաքում, իսկ մարզերից՝ Կոտայքի մարզում:

Բացի այդ, նույն ժամանակահատվածում բավականին հետաքրքիր տվյալներ են արձանագրվել Հարկային և մաքսային համակարգում հետաքննության նյութերով առնչվող անձանց վերաբերյալ:
Մասնավորապես, գրանցվել է ընդամենը 8 ապօրինի ձեռնարկատիրություն, 5 կեղծ ձեռնարկատիրություն, 77 կանխամտածված սնանկություն, 175 հարկը, տուրքը կամ պարտադիր այլ վճարը չվճարելու դեպք, 5 Կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելը կամ իրացնելու դեպք, 1 Ակցիզային դրոշմանիշեր և (կամ) դրոշմապիտակներ կեղծելը կամ իրացնելու դեպք, 1 մաքսանենգության դեպք:

Ի՛նչ խոսք, արձանագրված թվերը մտահոգիչ են: 
Միանշանակ պնդել, որ արված վիճակագրությունն օբյեկտիվ է և արտացոլում է իրականությունը, դժվար է, բայց միայն այն հանգամանքը, որ շուրջ 1723 դեպքով ավելացել են հանցագործությունների թիվը, մտորելու և լուրջ հետևություններ անելու տեղիք է տալիս:
Հ.Գ. Տվյալները վերցված են ՀՀ վիճակագրական կոմիտեի պաշտոնական կայքից»: