Ինձ համար անակնկալ էր, որ իմացա՝ ընտրվել եմ խորհրդի նախագահ. Լևոն Աբրահամյան

««Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամի հոգաբարձուների խորհրդի նորընտիր նախագահ Լևոն Աբրահամյանը տեղյակ չի եղել իր ընտրության մասին: Ի դեպ՝ տվյալ պաշտոնը նախկինում զբաղեցնում էր ՀՀ 3-րդ նախագահ Սերժ Սարգսյանի եղբայրը՝ Լևոն Սարգսյանը:  

«Ինձ համար անակնկալ էր, որ իմացա՝ ընտրվել եմ խորհրդի նախագահ: Նիստի ընթացքում որոշվել է, որ նախագահը չպետք է լինի ո՛չ պաշտոնյա, և ո՛չ էլ Մատենադարանի աշխատակից: Դրա համար էլ երևի ես ընտրվեցի, չնայած՝ էլ մարդ չէր մնում (ժպտում է,-խմբ.)»,- ԼՈՒՐԵՐ.com-ի հետ զրույցում նշեց Աբրահամյանը: 

Նորընտիր նախագահը մանրամասնեց, որ 2 օր է, ինչ գտնվում է Հայաստանում և դեռ տեղյակ չէ Մատենադարանում առկա խնդիրներից, բացթողումներից.«Ընդհանուր առմամբ, կարծում եմ՝ կլինեն խնդիրներ, սակայն հստակ ոչ մի բանից դեռ տեղյակ չեմ»:

Անդրադառնալով նույն պաշտոնն իրենից առաջ զբաղեցրած Լևոն Սարգսյանին, Լևոն Աբրահամյանն ընդգծեց, որ իր համար ամենավատը Սարգսյանին փոխարինելն էր, քանի որ շատ լավ ճանաչում է վերջինիս և միասին եղել են նույն գիտխորհրդում:

«Ես նրանից վատ բան չեմ տեսել: Լինում են, չէ՞ ընտանիքներում միշտ այնպիսիները, որոնք տարբերվում են. Լևոն Սարգսյանն ա՛յ այդ տարբերվողն է իրենց ընտանիքում: Համացանցում տեսնում եմ, որ շատերը հրճվանքով են նշում, որ Լևոն Սարգսյանն այլևս խորհրդի նախագահ չէ, երևի դա նաև նրանից է, որ ես որևէ կուսակցության ներկայացուցիչ չեմ և կոմպրոմատներ չունեմ, կամ էլ ունեմ՝ դեռ չեն գտել (ժպտում է,-խմբ.)»,- ասաց «Մատենադարան» հիմնադրամի հոգաբարձուների խորհրդի նորընտիր նախագահ Լևոն Աբրահամյանը:

Հավելենք, որ Լևոն Աբրահամյանը ազգագրագետ է, պրոֆեսոր, Հայաստանի գիտությունների ազգային ակադեմիայի թղթակից անդամ, Հայաստանի Հանրապետության մշակույթի վաստակավոր գործիչ: 

Հիշեցնենք, որ 2018 թվականի հունվարի 18-ին ՀՀ նախկին նախագահ Սերժ Սարգսյանի եղբայրը` Լևոն Սարգսյանը, միաձայն ընտրվել էր ««Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամի հոգաբարձուների խորհրդի նախագահ։

Արմինե Միքայելյան