Եթե թեկնածություն դնի ոչ թե ֆիզիկական անձ, այլ Նիկոլի սելֆիի ձողը, էլի 1-ին տեղն է գրավելու․ Արմեն Աշոտյան

Քաղաքական 13 Նոյեմբեր, 2018 17:36

«Ռոմանտիկ տրամադրություն է այսօր խորհրդարանում. կարծես «Վերջին զանգի»»,-այսօր խորհրդարանում իր ելույթն այսպես սկսեց ԱԺ ՀՀԿ խմբակցության պատգամավոր Արմեն Աշոտյանը։

«Ես հասկանում եմ, որ Հայստանի նորագույն պատմության մեջ դժվար է մարսել Հայաստանի պատմության մեջ առաջին նախադեպը, երբ նախորդ իշխանությունները ոչ թե ջախջախվում, տրոհվում են, ինչպես կոմունիստները, ՀՀՇ-ն էր նույն կազմով, այլ փորձում են ինստիտուցիոնալ քաղաքական համակարգի կայացման ավանդույթներ դնել: Կարծում եմ՝ սա այն դեպքն է, երբ Հանրապետական կուսակցության մասնակցությունը ընտրություններին իրականում նպաստելու է ժողովրդավարության զարգացմանը Հայաստանում, որովհետև և մեր գիտելիքները, և մեր փորձը կարող են շատ թանկ պաշար լինել նաև այս իշխանությունների համար»,-ասաց Արմեն Աշոտյանը։

Աշոտյանը տեղեկացրեց, որ ռեյտինգային ընտրակարգով դնելու է իր թեկնածությունը Երևանի թիվ 4 ընտրատարածքում, որն ընդգրկում է նաև իր ծննդավայրը՝ Էրեբունի վարչական շրջանը:

«Հույս ունեմ, որ կլինեն մարդիկ, ովքեր կուզենան խորհրդարանում տեսնել քաղաքական գործիչների, որոնք ունեն գործադիր իշխանության, երկիրը ներկայացնելու փորձ, ինչպես նաև փորձ՝ այս իշխանությունների հետ աշխատելու»,-նշեց Աշոտյանը:

Խոսելով երկու փոխվարչապետերի՝ Արարատ Միրզոյանի և Տիգրան Ավինյանի հայտարարություններին ու հորդորեց նրանց՝ չլինել այդքան ինքնավստահ:

«Մեկը մյուսից ընտիր ելույթ են ունեցել, մեկն ասում է՝ մրցակից չունենք, ՀՀԿ-ն մեզ մրցակից չէ, մյուս փոխվարչապետն ասում է՝ մենք արդեն հաղթել ենք: Տղե՛րք, նորից ասեմ՝ մի՛ կրկնեք իմ ու Շարմազանովի սխալները, մի՛ եղեք այդքան ինքնավստահ, որովհետև կործանումը սկսում է մեծամտությունից, գոռոզամտությունից: Մի՛ արեք դա: Լավ է՝ մի բարեկիրթ նախարար գտնվեց՝ կրթության, գիտության նախարարը, որը ասաց, թե բոլորն են իրենց մրցակից: Ախր, եթե գլուխ եք գովում Նիկոլի շուքի, ստվերի տակ, հիշեք՝ եթե ձեր նախընտրական եռյակի առաջին տեղում լինի Նիկոլի ուսապարկը, Նիկոլի «դուխով» կեպկեն՝ 2-րդ, Նիկոլի հազը՝ 3-րդ, դուք, մեկ է, 80 տոկոս ձայն եք հավաքելու: Իմ ռեյտինգային ընտրատարածքում թեկնածություն դնի ոչ թե ֆիզիկական անձ, այլ Նիկոլի սելֆիի ձողը, էլի առաջին տեղն է գրավելու: Էս նիկոլամանիայի պտուղները գտեք, քաղեք, բայց մի՛ թափահարեք: Դուք գուցե ունեք լումա, բայց ոչ այնքան, որ այդ քաղաքական ժառանգությունը վերագրեք ձեզ»,-ասաց Արմեն Աշոտյանը: