Աշոտ Աղաբաբյանը՝ ՀՖՖ նախագահի հայտարարությունների և խորհրդարանական ընտրություններին իր դիրքորոշման մասին

Աշոտ Աղաբաբյանին պատկանող «Հրազդան» մարզադաշտը HSBC բանկում գրավ է դրված 26 մլն դոլարի դիմաց: Այս մասին նոյեմբերի 12-ին, լրագրողների հետ հանդիպման ժամանակ հայտարարեց Հայաստանի ֆուտբոլի ֆեդերացիայի նախագահ Արթուր Վանեցյանը: Նա նշեց, որ անգամ գրավից հանելուց հետո այն կրկին ըստ նշանակության օգտագործելը շատ բարդ կլինի: Այս և մի շարք այլ թեմաների շուրջ ԼՈւՐԵՐ․com-ի թղթակիցը զրուցեց ԱԺ ՀՀԿ-ական նախկին պատգամավոր, «Հրազդան կենտրոնական մարզադաշտ» ՓԲԸ սեփականատեր Աշոտ Աղաբաբյանի հետ՝ պարզելու, թե որքան է կազմում պարտքը, ինչ վիճակում է մարզադաշտը, ինչպես նաև՝ մասնակցելո՞ւ է արդյոք արտահերթ խորհրդարանական ընտրություններին, թե՝ ոչ։

- Պարո՛ն Աղաբաբյան, ՀՖՖ նախագահը հայտարարեց, որ «Հրազդան» մարզադաշտը գրավ է դրված 26 մլն դոլարով, իսկապե՞ս դեռևս այդքան պարտք ունեք բանկին։

-  ՀՖՖ նախագահին սխալ տեղեկություն են տվել, քանի որ 26 մլն դոլարը բանկի կողմից գնահատված աճուրդային գինն է։ Իսկ մեր պարտքը բանկին՝ ընդամենը 3 մլն դոլար է։

- Վանեցյանը նշեց, որ մարզադաշտի վերակառուցման համար անհրաժեշտ կլինի շատ ավելին, քան գրավն է։ Բացի այդ՝ նշել էր՝ փաստ չէ, որ վերակառուցումից հետո ՖԻՖԱ-ն ու ՈՒԵՖԱ-ն թույլ կտան այնտեղ հանդիպումներ անցկացնել, քանի որ մի շարք առումներով՝ մարզադաշտը չի համապատասխանում միջազգային չափորոշիչներին: Ճի՞շտ է Վանեցյանի այս պնդումը։ 

- Համաձայն չեմ այդ տեսակետի հետ, քանի որ մարզադաշտն ՈւԵՖԱ-ի բոլոր պահանջներին համապատասխանում է։ Եթե չհամապատասխաներ՝ ինչպե՞ս կարող էինք նախագահների մասնակցությամբ Թուրքիայի հետ խաղն անցկացնել այստեղ, հետագայում ևս մի քանի միջազգային խաղ ընդունել մեր հարկի տակ։ «Հրազդան» մարզադաշտը լիովին համապատասխանում է ՈւԵՖԱ-ի պահանջներին։ Ինչ պայմաններ անհրաժեշտ են ժամանակակից ստադիոնին՝ «Հրազդան»-ն ունի։ Այն նաև եզակի ճարտարապետական շինություն է և 2018 թվականին Կառավարության փորձագիտական հանձնաժողովի որոշմամբ ստացել է պատմության և մշակույթի անշարժ հուշարձանի կարգավիճակ:

Վանեցյանին սխալ ինֆորմացիա են տվել՝ «Հրազդան» մարզադաշտի վիճակի հետ կապված։ Ուստի, ֆեդերացիան կարող է հանձնաժողով ստեղծել, այցելել, ուսումնասիրել և գնահատել, թե ինչպիսի վիճակում է այն, ոչ թե սխալ ինֆորմացիայի հիման վրա եզրակացություն անել։

Մարզադաշտը վերանորոգելու համար այնքան էլ մեծ գումարներ պետք չեն։ 2012թ. օգոստոսի 10-ին Ֆուտբոլի Ֆեդերացիայի հետ կնքված` 20 տարի ժամկետով անհատույց օգտագործման մասին պայմանագրով, մարզադաշտը անհատույց կերպով, տրամադրվել է Հայաստանի ազգային հավաքականի խաղերն անցկացնելու համար, սակայն միառժամանակ անց՝ ՀՖՖ-ի նախկին նախագահը դադարեցրեց պայմանագրով նախատեսված հավաքականի մարզումները մեր հարկի տակ: Այդ ժամանակ խոտածածկը գերազանց վիճակում էր, հետագայում, երբ սննկացանք, չկարողացանք ֆինանսներ ուղղել խոտածածկի պահպանման համար, բազմիցս դիմեցինք Ֆեդերացիային, որ պայմանագրի շրջանակներում զբաղվի խոտածածկի խնամքով, սակայն ֆեդերացիայի նախկին նախագահը չարձագանքեց, ու հիմա խոտածածկն այնքան էլ լավ վիճակում չէ։ Եթե պայմանագիրը շարունակվի, եթե հավաքականը այստեղ խաղա, ամեն ինչ իր տեղը կընկնի։ Մենք 20 տարով պայմանագիր ունենք, որից վեց տարին է ընդամենը անցել։ 

- Վանեցյանն ընդգծեց, որ ՈւԵՖԱ-ն ու ՖԻՖԱ-ն մշտապես փոփոխում ու խստացնում են իրենց ստանդարտները: Այդ պատճառով ֆեդերացիան նախաձեռնել է նոր՝ «Ազգային», մարզադաշտի կառուցում: Անգամ հանդիպումներ են նախատեսվում ներդրողերի հետ։ Հնարավո՞ր է՝ նոր մարզադաշտ կառուցելու հանգամանքով է պայմանավորված ՀՖՖ նախագահի դիրքորոշումը։ 

 - Եթե ուզում են՝ թող կառուցեն, ինչքան շատ լինեն մարզադաշտերը, այնքան ֆուտբոլային կլինի մեր երկիրը։ «Հրազդան»-ը տարածաշրջանի ամենամեծ ստադիոնն է, ինչը փաստում է, որ արդեն իսկ համարվում ենք ֆուտբոլային երկիր։ Ես մեկ անգամ էլ եմ ասել՝ պատրաստ եմ մարզադաշտի 50 %-ը տալ պետությանը, միայն թե հոգ տանեն դրա մասին։

- Պարո՛ն Աղաբաբյան, անդրադառնանք նաև քաղաքական կյանքին։ Առաջիկայում տեղի կունենան ընտրությունները։ Ի՞նչ կասեք քաղաքական ուժերի դասավորումների մասին։

- Ոչ ոք չի կարող ասել, թե ժողովուրդն ում ընտրի։ Այսօր ժողովուրդը հստակ գիտի՝ ում տա իր ձայնը։ Ես, բնականաբար, իմ նախկին ընտրողներին հորդորում եմ՝ իրենց կարծիքն արտահայտեն, ոչ թե ուրիշի։

Հայաստանում այսօրվա խաղաղ վիճակը պայմանավորված է Նիկոլ Փաշինյանով, ուրիշ էլ ո՞ւմ պետք է ժողովուրդը ձայն տա։ Եվ ես, այո՛, սատարելու եմ Փաշինյանի կուսակցությանը։

- Պարբերաբար քննադատության են արժանանում Փաշինյանի նշանակած կադրերը։ Ըստ Ձեզ՝ ինչպիսի՞ն են նրանք։ Հավանո՞ւմ եք Փաշինյանի կադրային քաղաքականությունը։ 

- Ոչ ոք պրեզիդենտ կամ վարչապետ չի ծնվում։ Բոլորն էլ աշխատանքի արդյունքում կհմտանան։ Կարևորը երիտասարդության ֆակտորն է: Ես ընդունում եմ նրանց, նրանք եմ մեր ապագան։ Նորերը կարող են նաև սխալվել, դա էլ է նորմալ։ Բայց որ Հայաստանն այսօր վերածնունդ է ապրում՝ փաստ է։

-Հնարավո՞ր է Ձեզ տեսնենք ինչ-որ կուսակցության շարքերում։

- Ես չեմ ուզում մասնակցել ընտրություններին։ Իմ տեղը զիջում եմ երիտասարդներին։ Իսկ ընտրություններին կսատարեմ Նիկոլ Փաշինյանին՝ որպես միակ տղա, որին ժողովուրդը հավատաց, ձայն տվեց ու գնաց նրա հետևից։

- Ի՞նչ եք կարծում՝ Հանրապետական կուսակցությունը պետք է լինի՞ խորհրդարանում։

- Մշտապես ասել եմ՝ Հանրապետականում սերնդափոխություն է հարկավոր։ Ինքնուրույն մտածող մարդիկ, երիտասարդներ են պետք, ոչ թե կամակատարներ։ Միայն այս պարագայում կարող են հայտնվել խորհրդարանում։

Հիշեցնենք՝ ՀՀԿ-ական նախկին պատգամավոր Աշոտ Աղաբաբյանը 2017թ․ կայացած խորհրդարանական ընտրություններում չընդգրկվեց ՀՀԿ ցուցակում, ինչի արդյունքում չզբաղեցրեց նաև պատգամավորական աթոռ, թեպետ 2003 թվականից՝ խորհրդարանական բոլոր ընտրություններն անցնելով, տեղ էր գրավել խորհրդարանում: 

Հարցազրույցը՝ Սոնա Հարությունյանի