Ամենակարևորի մասին չե՛ն խոսում

Խորհրդարանական արտահերթ ընտրություններին մասնակցող կուսակցություններն այսօր Կենտրոնական ընտրական հանձնաժողով ներկայացրին իրենց ամբողջական ցուցակները, որոնք աչքի են ընկում իրենց բազմազանությամբ:

Եթե նախորդ ընտրության ժամանակ ամենահետաքրքիր ցուցակը համարվում էր ՀՀԿ-ինը, ապա այս անգամ ողջ ուշադրությունը «Իմ Քայլը» դաշինքի կազմի վրա է․

Քաղտեխնոլոգ Արմեն Բադալյանը ԼՈՒՐԵՐ.com-ի հետ զրույցում անդրադառնալով քաղաքական ուժերի ներկայացրած ցուցակներին, նշեց, որ տվյալ ուժերի ամենամեծ սխալն այն է, որ  ոչ ոք չի ներկայացրել, թե որոնք են, իրենց պատկերացմամբ, Հայաստանի զարգացման տեսլականները, զարգացման վեկտորը և, որ դրանք պետք է պաշտպանեն Ազգային ժողովում:

«Բոլոր կուսակցություններն իրենց առաջնահերթությունն են համարում ցուցակ կազմելն ու դրանց մասին անվերջ խոսելը, բայց, թե ինչի համար են գնում ԱԺ, ա՛յ դրա մասին չեն խոսում։ Ամենակարևոր այս մասը չկա»,- մանրամասնեց քաղտեխնոլոգը:

Մեր այն դիտարկմանը, որ մասնավորապես «Իմ Քայլը» դաշինքի ցուցակում ներգրավված են մի շարք լրագրողներ և ոստիկաններ, դա ինչպե՞ս կազդի նրանց մասնագիտական գործունեության անաչառության վրա, Արմեն Բադալյանը նկատեց.«Ոստիկանը, երբ ընդգրկվում է քաղաքական որևէ ուժի ցուցակում, այդ պահից սկսած, նա դադարում է ոստիկան լինելուց, նույնը նաև վերաբերում է լրագրողներին, քանի որ նրանք դառնում են արդեն կուսակցական լրագրող և առաջ են տանում իրենց կուսակցական շահերը: Խնդիրն այն է, որ չկա ցուցակում ընդգրկվելու սկզբունքը, նպատակը: Ցուցակները կազմվում են ըստ կուսակցության ղեկավարի ցանկության՝ ծանոթ, բարեկամի մոտեցմամբ»:

Վերջում քաղտեխնոլոգն անդրադառնալով Ընտրական օրենսգրքի տապալմանը, շեշտեց, որ այս ընտրություններին հենց այս օրենսգրքով պետք է մասնակցեն քաղաքական բոլոր ուժերը, որ հասարակությունը տեսնի իրական պատկերը: «ԸՕ-ն քաղաքական հայելու դերակատարում ունեցավ այս ընտրություններում: Այս օրենսգիրքը չնայած նրան, որ ցույց է տալիս քաղաքական ուժերի խղճուկ վիճակը, միևնույն ժամանակ, հնարավորություն է տալիս թեկնածուներին իրենց ընտրատարածքներում դրսևորվելու»,- նշեց մեր զրուցակիցը և հավելեց, որ շեշտադրումը պետք է դնել ոչ թե ընտրողի, այլ՝ ընտրվողի վրա:

Արմինե Միքայելյան