Հեղափոխական թիմի վրիպումներն ու ձեռքբերումները. տրված ո՞ր խոստումներն է կատարել Փաշինյանը

Հայաստանի Հանրապետության վարչապետի պաշտոնակատար Նիկոլ Փաշինյանն արձանագրում է, որ Հայաստանում հեղափոխություն իրականացրած քաղաքական թիմը այսօրվա դրությամբ կատարել է ժողովրդի առաջ ստանձնած բոլոր պարտավորությունները: Գեղարքունիքի մազի Մարտունի քաղաքում բնակիչների հետ հանդիպմանը ՀՀ վարչապետի պաշտոնակատարն ընդգծեց, որ սա շատ կարևոր է: Միևնույն ժամանակ  փորձելով դրական ֆոն ստեղծել նախկին և ներկա իշխանությունների միջև Փաշինյանը հայտարարում է, որ իրենց կառավարությունը ի տարբերություն նախորդների ժողովրդին չի թալանում և չի գռփում: Սա անշուշտ ողջունելի, բայց չպետք է մոռանալ, որ հեղափոխությունները տեղի են ունենում ոչ միայն նախկին համակարգից ազատվելու, այլ դրա փոխարեն որակապես ավելի լավը ստեղծելու , ժողովրդի կենսամակարդակը, քաղաքական-պետական ինստիտուտների աշխատանքի մակարդակը բարձրացնելու նպատակով:

Արդյո՞ք Փաշինյանի թիմը իսկապես կատարել է թավշյա հեղափոխության օրերին հրապարակում ստանձնած իր պարտավորությունները: Օրինակ՝ «Իմ քայլը» շարժման ղեկավարը հրապարակավ ազդարարել էր՝ վերջ կոռուպցիային: Վերջին վեց ամիսներին նոր իշխանությունների կողմից արվեց հնարավորը՝ կոռուպցիոն ռիսկերը նվազագույնի հասցնելու ուղղությամբ: Կոռուպցիան դա մի երևույթ է որի դեմ պայքարը անգամ երկու-երեք տարվա խնդիր չէ, հետևաբար վեց ամսվա համար կատարաված աշխատանքը կարելի է բավարար համարել: Փաշինյանը հրապարակում վստահեցրել էր, որ հեղափոխությունից հետո Հայաստանում այլևս չեն լինի քաղբանտարկյալներ՝ արդյունքում մենք ունենք անկախությունից ի վեր աննախադեպ համարվող համաներում՝ ասել է թե Փաշինյանը կատարել է հանրության առջև ստանձնած իր այս պարտավորությունը: Փաշինյանը նաև վստահեցնում էր, որ հեղափոխության հետևանքով չի տուժի մեր երկրի միջազգային իմիջը, ընդհանուր առմամբ պետք է փաստել, որ վարչապետի պաշտոնակատարին հաջողվել է ապահովել միջազգային հանրության՝ հայկական թավշյա հեղափոխության հանդեպ դրական ընկալումը:

Հրապարակում Փաշինյանը խոստացել էր  արտահերթ խորհրդարանական ընտրությունները կազմակերպել Նոր ընտրական օրենսգրքով, սակայն ինչ-ինչ պատճառներով վարչապետը և իր թիմը հետևողական չգտնվեցին նոր օրենսգրքի ընդունման հարցում և այսօր ունենք այն ինչ ունենք՝ հին ընտրական օրենսգիրքը իր ռեյտինգային ընտրակարգով վերակենդանացման փայլուն հնարավորություն են ստեղծում նախորդ համակարգը ներկայացնող քաղաքական ուժերի համար:

Հրապարակում Փաշինյանը երկրի ծանր սոցիալ-տնտեսական վիճակը պայմանավորում էր առկա կոռուպցիայով և թալանով՝ հեղափոխության հաղթանակի դեպքում պարտավորվելով ոչ միայն ներդրումային «բում» ապահովել, այլ նաև բարձրացնել քաղաքացիների կենսամակարդակը՝ աշխատավարձերի,թոշակների, նպաստների բարձրացման տեսքով: Ամիսներ անց մենք ունենք բացասական ներդրումային ֆոն: Ներդրումների բացակայությունը իրական գլխացավանք  է դարձել Փաշինյանի կառավարության համար, սակայն լուծումները դեռ չեն գտնվել:Աշխատավարձերի և թոշակների բարձրացման խոստումներին փոխարինելու է եկել «ոչխար պահելու», «800 հազար թամբալների» մասին արդեն թևավոր դարձած հայտարարությունները:

Նիկոլ Փաշինյանի խոստումը թե ոչ մի բարեկամ, ընկեր, հարազատ չպիտի նշանակվի որևէ պաշտոնում, ցավոք սրտի չիրականացավ: Անցած վեց ամիսների ընթացքում հենց Փաշինյանի թիմակիցների կողմից խնամի-ծանոթ-բարեկամ տեղավորելու բազմաթիվ դեպքեր արձանագրվեցին.Այս առումով հատկապես աչքի էին ընկնում սփյուռքի և առողջապահության նախարարները, հասարակական վրդովմունքի արդյունքում եղան որոշ պաշտոնյաների հրաժարականներ, սակայն նրանց մեծ մասը շարունակում է աշխատել հեղափոխական թիմի հետ: 

Փաշինյանը խոստանում էր ՀՀԿ-ին «ջնջել Հայաստանի քաղաքական կյանքից», բայց արի ու տես նախկին իշխանությունը ներկայացնող ուժը այսօր մասնակցելու է արտահերթ խորհրդարանական ընտրություններին և ունի խորհրդարանում հայտնվելու մեկնարկային շատ լավ հնարավորություններ: Փաշինյանը հրապարակավ պարտավորվել էր բացահայտել Մարտի 1-ի գործը, ընդհամենը երկու ամիս առաջ էլ վարչապետը հայտարարեց թե այս գործը ամբողջությամբ բացահայտված է: Սակայն պետք է նշել, որ Մարտի 1-ի գործով հիմնական մեղադրյալները այս պահին ինչ-ինչ հանգամանքներից ելնելով ապաստանել են արտերկրում, մի շարք առանցքային դերակատարն էր էլ անգամ չեն հարցաքննվել՝  առաջին նախագահ Լևոն Տեր-Պետրոսյանը, երրորդ նախագահ Սերժ Սարգսյանը: Ինչ վերաբերվում է երկրորդ նախագահ Ռոբերտ Քոչարյանին, ապա նրան ներկայացրած մեղադրանքի հիմնավորման գործում պատկան մարմինները լուրջ խնդիրների են բախվել:

Ասվածից ակնհայտ է դառնում, որ հեղափոխական թիմի՝ հրապարակում ստանձնած ոչ բոլոր պարտավորություններն են իրականություն դարձել: Նաև այս ասպեկտից պետք է դիտարկել արտահերթ խորհրդարանական ընտրություններում Նիկոլ Փաշինյանի շտապողականությունը՝ մինչև մայիս բազմաթիվ տրված խոստումներ են «ջրվելու» ինչը միանշանակ հասարակության վրա սթափեցնող ազդեցություն է ունենալու…

Ստելլա Խաչատրյան