Նախկին մոտեցումները ոչ միայն շարունակվում են, այլ ավելի են սրանում

«Ես տեսնում եմ ընտրովի արդարադատություն, որի հիմքով հերթական անգամ դատարանն անհիմն մերժեց խափանում կալանքը գրավով փոխարինելու միջնորդությունը»,- այս մասին ԼՈՒՐԵՐ.com-ի հետ զրույցում ասաց Նորք-Մարաշում վնասազերծված զինված խմբի «պարագլուխ» Արթուր Վարդանյանի փաստաբան Լևոն Բաղդասարյանը՝ անդրադառնալով դատարանի այսօրվա որոշմանը, որով մերժվում է Վարդանյանին 3 մլն դրամ գրավի դիմաց ազատ արձակելու՝ պաշտպանական կողմի միջնորդությունը:

Արթուր Վարդանյանի փաստաբանի խոսքով՝ մեղադրող կողմը հանդես է եկել հայտարարությամբ, թե իբր Վարդանյանը ազատության մեջ  գտնվելով՝ հնարավոր է՝ խոչընդոտի գործի քննությանը։ 

«Ասել, որ կխոչընդոտի, բայց տակը փաստարկ չդնել՝ անթույլատրելի է, արգելված է մեր Սահմանադրությամբ. վերլուծական դատողություններով չի կարելի մարդկանց պահել կալանքի տակ: Նախկին մոտեցումները ոչ միայն շարունակվում են, այլ ավելի են սրանում»,-մանրամասնեց Լևոն Բաղդասարյանը և հավելեց, որ այդ ամենն ակնհայտ երևում է ավելի շատ հենց իր պաշտպանյալի մասով:

Հիշեցնենք, որ 2015թ. Նորք Մարաշում Ազգային անվտանգության ծառայությունը վնասազերծել է զինված խմբի, տվյալ գործի շրջանակում մեղադրանք է առաջադրվել ավելի քան երեք տասնյակ մարդու: Ըստ մեղադրանքի` Արթուր Վարդանյանի գլխավորած զինված խումբը ծրագրել էր բռնությամբ զավթել իշխանությունը, օրինակ՝ թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության և այլ հաստատությունների շենքերի վրա:

Նրանց մեղադրանքներ են առաջադրվել հանցավոր համագործակցություն ստեղծելու և ղեկավարելու (Քրեական օրենսգրքի 223-րդ հոդվածի 1-ին մաս), հանցավոր համագործակցությանը մասնակցելու (Քրեական օրենսգրքի 223-րդ հոդվածի 2-րդ մաս) և կազմակերպված խմբի կողմից ապօրինի կերպով հրազեն, ռազմամթերք, պայթուցիկ նյութեր ձեռք բերելու, իրացնելու, պահելու, փոխադրելու և կրելու (Քրեական օրենսգրքի 235-րդ հոդվածի 3-րդ մաս) համար:

Արմինե Միքայելյան