Առաջարկը ստացել եմ Խաչատուր Քոքոբելյանից․ ինչու է ռեփերը որոշել պատգամավոր դառնալ

«Առաջարկը ստացել եմ «Ազատ դեմոկրատներ» կուսակցության ղեկավար Խաչատուր Քոքոբելյանից։ Եթե չեմ սխալվում՝ ցուցակում 65-րդն եմ։ Ես անկուսակցակամ եմ, դրա համար՝ գտնում եմ՝ իմ մասնակցությունն ընտրություններին պետք է լինի ռեյտինգայինով։ Երևանցիներն ունեն իրենց թեկնածուին՝ ի դեմս ինձ, իսկ շանսերս գնահատում եմ բարձր։

Ընտրություններին մասնակցելու որոշմանս պատճառն այն է, որ գտնում եմ՝ իմ գիտելիքները, եռանդն ու ներուժը կարող եմ օգտագործել ի շահ Հայաստանի և ՀՀ քաղաքացիների։ Քանի որ կիսում եմ «Մենք» դաշինքի գաղափարները, վաղուց ճանաչում եմ դաշինքի ներկայացուցիչներին, ուստի որոշեցի իրենց հետ համագործակցել»,- ԼՈւՐԵՐ․com-ի թղթակցի հետ զրույցում ասաց «Մեծ Հայք» խմբից հայտնի ռեփեր, այժմ՝ «Մենք» դաշինքի պատգամավորի թեկնածու Ֆելիքս Պետրոսյանը՝ ավելացնելով, որ թեև առաջիկայում մանրամասն կներկայացնի իր ծրագիրը, սակայն, ընդհանուր առմամբ, գործելու է ժամանակակից մեթոդներով։

Նա նշեց՝ ակտիվ քաղաքական գործունեությամբ չի զբաղվել, բայց հետևել է դրան․ «Քաղաքականության մեջ իմ ունեցած լուման այնքան քիչ է եղել, որ իմաստ չեմ տեսնում դրա մասին հայտարարություններ անելու, բայց ես մշտապես հետաքրքրված եմ եղել դրանով, տեղյակ եմ եղել անցուդարձին, ունեմ քաղաքական գործիչ ընկերներ։ Ավելի շատ զբաղվել եմ եղբորս՝ Նարեկի գործերով, փրոդաքշնով»,- նշեց պատգամավորի թեկնածուն։ 

Արդյոք հեղափոխությո՞ւնն էր պատճառը, որ որոշեց զբաղվել քաղաքականությամբ հարցին ի պատասխան՝ Պետրոսյանն ասաց․ «Դրանով ևս պայմանավորված էր, սակայն հիմա Հայաստանում հավասար պայմաններ են․ նախկին իշխանությունների օրոք այլ էր, հիմա՝ այլ։ Մենք մասնակցություն ենք ունեցել հեղափոխությանը, կարծում եմ՝ քաղաքակիրթ, դեմոկրատական երկրում պարտադիր պետք է լինի ընդդիմություն, ինչպիսին լինելու է «Մենք» դաշինքը»,- նշեց նա՝ ընդգծելով, որ փորձելու ենք աշխատել այնպես, որ միակենտրոն իշխանություն չլինի, պահպանվի թե՛ քաղաքական, թե՛ հասարակական դիալոգը։

Հանրությունը Ֆելիքս Խաչատրյանին հիշում է «Քամի փչի» տեսահոլովակից, որտեղ վերջինս հանդես էր գալիս ռեփ կարդալով։ Այնուհետև, նա մի քանի նախագծի մասնակցելուց հետո անհետացավ հասարակության աչքից՝ ըստ տեղեկությունների՝ բնակություն հաստատելով այլ երկրում։ Անդրադառնալով այս խոսակցություններին՝ Պետրոսյանը հերքեց դրանք՝ նշելով, որ երբևէ որևէ երկրում մշտական բնակություն չի հաստատել․ «Ես գրեթե միշտ ապրել եմ Հայաստանում։ Չնայած վերջին տարիներին հաճախ եմ եղել Մոսկվայում, գնացել- եկել եմ, քանի որ բիզնես գործունեությամբ եմ զբաղվել, բայց հիմնականում բնակվել եմ Երևանում։ Այն ժամանակ ես որպես առաջին գծի մասնակից՝ մի քանի նախագծերում եմ հանդես եկել, բայց միշտ էլ կազմակերպչական առումով եղել եմ Նարեկի գործունեության մեջ, ժողովրդական լեզվով ասած՝ չեմ երևացել, բայց իմ մասնակցությունն ունեցել եմ»,- ընդգծեց Ֆելիքս Պետրոսյանը։ 

Սոնա Հարությունյան