Մերժվել է Վահագն Մարգարյանի վերջին հրաժեշտը Օպերայում կազմակերպելու խնդրանքը

 Բալետի Ազգային Ակադեմիական թատրոնի բալետի մենապարող 23–ամյա Վահագն Մարգարյանի վերջին հրաժեշտը Օպերայում կազմակերպելու Մարգարյանի ընկերների խնդրանքը ՀՀ մշակույթի նախարարությունը մերժել է՝ վաստակավոր արտիստ չլինելու պատճառով:

Մշակույթի նախարարության գլխավոր քարտուղար Սամվել Մուրադյանը նշել է, որ Մարգարյանի ընկերներն իրեն դիմել են աշխատանքային օրվա ավարտին:

«Թաղման կազմակերպման որոշակի ծիսակարգ ու ընթացակարգ կա: Վարչապետի որոշմամբ ստեղծվում է հանձնաժողով, որն էլ նիստ է գումարում եւ որոշում ընթացակարգը»,- մանրամասնեց Մուրադյանը:

Սամվել Մուրադյանը նաև նշել է, որ չնայած Վահագն Մարգարյանը բալետում մեծ անցյալ ունի, այնուամենայնիվ, կան ընթացակարգեր, որոնցով առաջնորդվում է կառավարությունը: 

Հիշեցնենք, որ  նոյեմբերի 6–ին ժամը 19.30-ի սահմաններում, «Մերսեդես» մակնիշի ավտոմեքենան Երեւան-Աշտարակ ճանապարհի 4-րդ կ/մ-ին բախվել է «Օպել» մակնիշի ավտոմեքենայի, ինչի հետեւանքով «Օպել»-ի վարորդը եւ չորս ուղեւորները մարմնական վնասվածքներով տեղափոխվել էին հիվանդանոց: Այդ մեքենայի մեջ նաեւ Վահագն Մարգարյանն է եղել։

Վերջինս մահացել է նոյեմբերի 20–ին Հերացի թիվ 1 բժշակական կենտրոնում։ Մարգարյանը միջազգային մրցույթների հաղթող էր, մրցանակակիր: Նա Հայաստանը ներկայացրել է նաեւ «Պատանի պարողների Եվրատեսիլ» մրցույթում։