Քրեական հեղինակություն «Շալիկոն» տուժող է ճանաչվել՝ սպանության նախապատրաստության գործով

Քրեական հեղինակություն Շալո Մանուչարյանը, որն առավել հայտնի է «Շալիկո» մականունով, տուժող է ճանաչվել իր դեմ սպանության նախապատրաստության գործով:

«Քրեական հեղինակության սպանություն նախապատրաստելու քրեական գործով տվյալ անձը ճանաչվել է տուժող»,- ԼՈւՐԵՐ․com-ի թղթակցի հետ զրույցում հայտնեց Քննչական կոմիտեի նախագահի խորհրդական Սոնա Տռուզնանը։

Օրեր առաջ, ՀԿԳ քննության գլխավոր վարչության աշխատակիցները ձերբակալել էին մեկ անձի, որը կասկածվում էր քրեական հեղինակություն համարվող անձի սպանությունը նախապատրաստելու մեջ: Նա Երևանից է, պրոֆեսիոնալ մարզիկ: Վերջինիս մեղադրանք է առաջադրվել սպանության նախապատրաստության համար (ՀՀ ՔՕ 35-104 հոդվածով) և որպես խափանման միջոց ընտրվել է կալանավորումը:

Նշենք՝ պարզվել է, որ 2017 թ․ մի խումբ անձանց կողմից նախապատրաստվել է Վանաձորի բնակիչ, քրեական հեղինակություն համարվող անձի սպանությունը, որն իրականացնելու համար Հայաստան է հրավիրվել նաև դիպուկահար, ով, լինելով ՀՀ քաղաքացի, վերջին տարիներին բնակվել է արտերկրում։ Վերջինս Հայաստան է ժամանել 2017 թվականի ապրիլի 19-ին և մի քանի օր նախ մնացել է օդանավակայանին հարակից հյուրատներից մեկում, ապա՝ հանցակցի հետ ապրիլի 24-ին տեղափոխվել Վանաձոր, որտեղ բնակվել են նախապես վարձակալված բնակարանում։

2017 թվականի ապրիլի 27-ի լույս 28-ի գիշերը վարձակալված բնակարանում հայտնաբերվել է դիպուկահարի դին՝ բազմաթիվ մարմնական վնասվածքներով: Քննությամբ բավարար ապացույցներ են ձեռք բերվել, որ սպանվածի դին Վանաձորից Երևան է տեղափոխվել նրա հանցակցի կողմից՝ սպանության, ինչպես նաեւ քրեական հեղինակության սպանության նախապատրաստության հետքերը թաքցնելու նպատակով։

Մեծածավալ քննչական գործողությունների արդյունքում պարզվել է Հայաստան ժամանելու նպատակով դիպուկահարին գումար ուղարկած,  ինքնաթիռի տոմս գնած, նրան օդանավակայանում դիմավորած և նշված հյուրատուն տեղափոխած անձի ինքնությունը, ով, ըստ քննության տվյալների, մի խումբ անձանց հետ միասին  առաջարկել է նրան իրականացնել քրեական հեղինակության սպանությունը։ Բացի այդ, բավարար տվյալներ են ձեռք բերվել, որ սպանությունն իրականացնելու համար ձեռք է բերվել օպտիկական հրազեն։