Նոյեմբերի 24-ի համաերևանյան «մոբիլիզացիան». ի՞նչ է հասկացնում Փաշինյանը

Վերլուծական 22 Նոյեմբեր, 2018 18:00

Երեկ երեկոյան վարչապետի պաշտոնակատար Նիկոլ Փաշինյանը հայտարարություն է տարածել՝ կոչ անելով նոյեմբերի 24-ին համաերևանյան երթ անցկացնել՝ հիշելով հեղափոխության օրերը: Մի կողմ դնենք այն, որ քարոզարշավի պաշտոնական մեկնարկից երկու օր առաջ նման երթ անցկացնելը օրենքի կոպիտ խախտում է: Սակայն համաերևանյան երթը ունի նաև այլ՝ ավելի հետաքրքիր և նուրբ տողատակեր, քան պարզապես նախընտրական արշավի էֆեկտային մեկնարկը:

Մի կողմից՝ Փաշինյանը՝ կազմակերպելով այս երթը, փորձում է հասկանալ իր աջակցության իրական մակարդակը և այն, թե անհրաժեշտության դեպքում որքան մարդ դուրս կգա փողոց: Գուցե Փաշինյանը որոշակի մտավախություններ ունի, որ վերջին ամիսների իրադարձություններից հետո հանրային աջակցության մակարդակը օբյեկտիվ պատճառներով նվազել է, և այս երթը միանշանակ ուղղված է հասարակության տրամադրությունները շոշափելուն:

Մյուս կողմից՝ Փաշինյանի նախաձեռնած երթը քաղաքական դեժավյու է առաջացնում: Կրկնվում են այս տարվա օգոստոսյան իրադարձությունները, երբ Փաշինյանը որոշեց իր 100 օրվա պաշտոնավարումն ամփոփել Երևանի սրտում կազմակերպված հանրահավաքում: Նիկոլ Փաշինյանի հայտարարությանը նախորդել էր Ռուսաստանի Դաշնության ԱԳ նախարար Սերգեյ Լավրովի հարցազրույցը, որի ժամանակ նա անդրադարձ էր կատարել Հայաստանում վերջին շրջանում ընթացող իրադարձություններին: Լավրովն իր հայտարարությունում նշել էր, որ Հայաստանի իրադարձությունները հակասում են նոր ղեկավարության՝ իրենց քաղաքական նախորդներին հետապնդելուց հրաժարվելու հայտարարություններին. «Ռուսաստանը, որպես Երևանի դաշնակից, միշտ շահագրգռված է եղել հայկական պետականության կայունությամբ: Այդ պատճառով, այնտեղ տեղի ունեցող իրադարձությունները չեն կարող մեզ չանհանգստացնել, ընդ որում՝ նաև ԱՊՀ այն կազմակերպությունների նորմալ աշխատանքի տեսանկյունից, որոնց անդամակցում է Հայաստանը»,-ասել էր Լավրովը: Փաշինյանը, հանրահավաք հրավիրելու իր հայտարարությամբ, ակնհայտորեն պատասխանում էր ՌԴ-ին: Նա օգոստոսի 17-ի հանրահավաքով ցանկանում էր ցույց տալ, թե ինչպիսի հանրային աջակցություն է վայելում և որ Ռուսաստանը չի կարողանա ազդել Հայաստանի ներքին իրավիճակի վրա:

Այս տարվա դեկտեմբերի վեցին Փաշինյանին լարված հանդիպում է սպասվում ՌԴ նախագահ Վլադիմիր Պուտինի հետ, բացի այդ՝ օրակարգում է լինելու ՀԱՊԿ գլխավոր քարտուղարի ընտրության հարցը: Ակնկալվում է, որ հայկական կողմը չի գնա որևէ կոմպրոմիսի և պնդելու է, որ մինչև 2020 թվականը այս պաշտոնը զբաղեցնի հենց Հայաստանի ներկայացուցիչը: Այս հարցում կոնսենսուս չկա և դժվար էլ լինի և այդ համատեքստում՝ այս հանրահավաքը նախ ցույց է տալու բոլոր ներքին ու արտաքին ուժերին, որ վարչապետը շարունակում է վայելել հասարակական լայն վստահություն և ունի լեգիտիմության բավական ամուր պաշար: Փաշինյանը մեսիջ է հղում դաշնակիցներն, որ ի տարբերություն Սերժ Սարգսյանի՝ իր հետ պետք է հաշվի նստեն, քանի որ գործելու մանդատը ստացել է ոչ թե քրեաօլիգարխիայից, այլ ժողովրդից: Սրանով, դեկտեմբերի 6-ին ընդառաջ՝ վարչապետի պաշտոնակատարը էականորեն կամրապնդի իր դիրքերը:

Ստելլա Խաչատրյան