Քաղաքացիներն ահազանգում են. ցուցակներում կան մահացածներ և քաղաքացիություն չունեցողներ

Դեկտեմբերի 9-ին կայանալիք խորհրդարանական արտահերթ ընտրությունների նախնական ցուցակները հրապարակված են և ՀՀ Ոստիկանության անձնագրային և վիզաների վարչության պետ Մնացական Բիչախչյանի խոսքով՝ նախորդ տարվա համեմատ՝ ընտրողների թիվն ավելացել է 12.000-ով:

Ըստ Բիչախչյանի՝ այս թիվը պայմանավորված է 18 տարին լրացած անձանցով, ինչպես նաև պարտադիր զինվորական ծառայությունից վերադարձածներով:

Հարկ է նշել, որ ինչպես նախորդ տարիների ընտրությունների ընտրությունների նախնական ցուցակներում, այնպես էլ այս ցուցակներում անմասն չեն մնում մահացածներն ու արտերկրում մշտական բնակության անցածները:

Թեմայի վերաբերյալ Մնացական Բիչախչյանը ԼՈՒՐԵՐ.com-ի հետ զրույցում նշեց, որ նախնական ցուցակների ուսումնասիրության արդյունքների վերաբերյալ դեռևս հրապարակման ենթակա տեղեկություն չկա:

Սակայն նշենք, որ ցուցակների հրապարակումից հետո թե՛ համացանցում և թե՛ դրանից դուրս մի շարք ահազանգեր են հնչում այն մասին, որ իրենց այն հարազատներն ու ծանոթները, որոնք մահացած են կամ մշտական բնակության են անցել արտերկրում, նույնպես հաշվառված են այս կամ այն ընտրատեղամասերում:

Նշենք նաև, որ ՀՀ Ոտիկանությունը հորդորում է, որ նմանատիպ դեպքեր արձանագրած քաղաքացիներն անպայման դիմեն  Անձնագրային և վիզաների վարչություն: