Քոչարյանի անվան հետ կապվող ընկերությունից հետ են վերցրել «ջրի գնով» տված 1000 հա որսատեղին

Քաղաքական 23 Նոյեմբեր, 2018 18:10

ԼՈՒՐԵՐ.com-ի տեղեկություններով՝ Վայոց Ձորի մարզի Ագարակաձորի համայնքապետն, անհասկանալի պայմաններում, համայնքին պատկանող 1000 հեկտար տարածքը նախորդ տարվա նոյեմբերին՝ համայնքների խոշորացումից առաջ՝ «ջրի գնով» վաճառել է «Վարդաբլուր» ընկերությանը, որը կապվում է ՀՀ 2-րդ նախագահ Ռոբերտ Քոչարյանի անվան հետ:

Համայնքների խոշորացումից հետո Ագարակաձորը մտել է Արենի համայնքի մեջ և հենց Արենիի ավագանու անդամ Անուշավան Ավետիսյանը մեզ հետ զրույցում հաստատեց մեր ունեցած տեղեկությունը՝ մանրամասնելով, որ Ագարակաձորի համայնքապետ Դերենիկ Մարտիրոսյանն այդ տարածքը վաճառել է Ռոբերտ Քոչարյանի խնդրանքով, որպեսզի վերջինս հանգիստ որս անի այդտեղ: Սակայն այս տարի, նորանշանակ փոխմարզպետ Ռազմիկ Տոնոյանի՝ գործը բացահայտելուց և տարածքը վերադարձնելուց հետո՝ Քոչարյանը հանդիպել է Ագարակաձորի համայնքապետի հետ:

«Մենք ամենասկսզբում այդ տարածքը տրամադրել էինք «Վայրի բնության պահպանության» հիմնադրամին, սակայն որոշ ժամանակ անց՝ նախորդ տարվա նոյեմբերի 2-ին, հրավիրվում է ավագանու արտահերթ նիստ՝ առանց ինձ և ևս 2 հոգու տեղյակ պահելու, ու պարզվում է, որ Ագարակաձորի համայնքապետը որոշել է, որ հիմնադրամը հրաժարվում է մեր պայմանագրից, իսկ մեկ այլ պայմանագրով էլ համայնքապետը որոշում է տարածքը տալ «Վարդաբլուր» բնապահպանական հիմնադրամին: Ակնհայտ սպառնալիք է եղել ինչ-որ մեկի կողմից: Սակայն տեղի է ունեցել ակնհայտ կեղծիք, այն է՝ պետռեգիստրում «Վարդաբլուր» հիմնադրամը գրանցվել է նոյեմբերի 7-ին, մինչդեռ Ագարակաձորի համայնքապետը 1000 հեկտարը նոյեմբերի 2-ին է վաճառել այդ կազմակերպությանը: Ստացվում է՝ տարածքը վաճառվել է մի կազմակերպության, որը գոյություն չունի»,-մանրամասնեց Արենիի ավագանու անդամ Անուշավան Ավետիսյանը:

Ավետիսյանի խոսքով՝ այս ամենը միտումնավոր է եղել և նախօրոք պլանավորված, ինչպես նաև ճնշում են գործադրել «Վայրի բնության պահպանության» հիմնադրամի՝ մեզ հետ համագործակցությունը դադարեցնելու նպատակով: Նա նաև նշում է, որ Ագարակաձորի համայնքապետն ասել է, թե այդ տարածքի համար իրեն դիմել է Ռոբերտ Քոչարյանը. «Դե, Քոչարյանին ո՞նց կարանք մերժենք, պիտի տանք իրան, պիտի տանք»,- ավագանու անդամի փոխանցմամբ՝ ասել է Ագարակաձորի համայնքապետը:

««Վարդաբլուրը» Քոչարյանին պատկանելու մասին մեզ ասել է նաև հենց Ագարակաձորի համայնքապետը. դա այնքան էլ գաղտնիք չէր: Իսկ ինչ վերաբերում է 1000 հեկտարի գնմանը, համայնքապետը դա վաճառել է հեկտարը 405 դրամով՝ ստանալով դրա համար ընդամենը 405.000 դրամ. դա ուղղակի խելքին մոտ գին էլ չէ: Այս տարածքը պարզապես աղետ էր ագարակաձորցիների համար, քանի որ տարածքը փակված էր «շլագբաումներով» ու մեխեր էին դրել, որ անցնող մեքենաների անիվները ծակվեն: Սակայն փոխմարզպետի՝ տարածքը վերադարձնելուց հետո, ժողովուրդը հանգիստ շունչ է քաշում»,- ասաց ավագանու անդամը:

Ինչ վերաբերում է օրերս Քոչարյանի՝ Ագարակաձոր այցին, ավագանու անդամը նշեց, որ նա իրոք եկել է, հանդիպում եղել է, բայց թե ինչ են քննարկել ագարակաձորցիների հետ՝ չի կարող ասել:

Ագարակաձորի համայնքապետ Դերենիկ Մարտիրոսյանը ԼՈՒՐԵՐ.com-ի հետ զրույցում տարածքը գոյություն չունեցող կազմակերպությանը վաճառելու մասին ոչինչ չցանկացավ ասել՝ ուղղորդելով, որ այդ հարցերի պատասխանները ստանանք ավագանուց: Քոչարյանի հետ հանդիպման մասին ևս ոչիչ չասաց, այլ միայն նշեց, որ այդ տարածքը կապ չունի Քոչարյանի հետ, իսկ վերցնելուց հետո սեփականատերը լուսավորել ու բարեկարգել է, մինչդեռ Արենիի ավագանու անդամը վկայեց, որ այդ ամենը կատարել է «ՎիվաՍել ՄՏՍ»-ը:

«Այդ տարածքն ի վերջո վերադարձվեց և ավարտվեց ժողովրդի ու Քոչարյանի միջև տարաձայնությունները»,-ասաց համայնքապետը: Ի պատասխան մեր այն դիտարկմանը, թե քիչ առաջ բացառում էր Քոչարյանի հետ կապը՝ Ագարակաձորի համայնքապետն ասաց՝ շփոթվել է:

Արմինե Միքայելյան