Կտավը վաճառվել է իբրև Մինասի գործ. կոռուպցիա՞, թե՞․․․

«Ամառը Ջաջուռում» վերնագրված կտավը կանադահայ Արտո Թավուկչիյանին վաճառվել է իբրև Մինաս Ավետիսյանի վրձնի գործ։ Թավուկչիյանն իր ֆեյսբուքյան էջում գրում է․ «Իմ երազանքն էր ունենալ Մինասի նկարներից, սակայն, ցավոք՝ հանդիպեցի մի խարդախի, որի անունն ու նկարը շուտով կհրապարակեմ»։ 

 

Կանադահայը հանդիպել է Մշակույթի նախարարության մշակութային արժեքների փորձագիտական կենտրոնի տնօրենի պաշտոնակատար Լիլիթ Սարգսյանին, վերջինս 1 ամիս առաջ ուսումնասիրությունից հետո հայտարարել է, որ կտավը Մինասի գործը չէ՝ կեղծ է։ Մինչդեռ Փորձաքննությունների ազգային բյուրոյի մշակութաբանական արժեքների բաժնի պետ Էմիլ Ավանեսովը համաձայն չէ՝ 2016թ․ իրենց կենտրոնի փորձաքննության արդյունքներով՝ կտավը Մինասինն է։ Նրա պնդմամբ՝ դա անգամ հաստատել է հանճարեղ նկարչի ընտանիքը և անձամբ՝ որդին։

 

Այս ամենից հետո խաբված գնորդն իրավական գործընթաց է սկսել։ ԼՈւՐԵՐ․com—ի թղթակցի հետ զրույցում, տուժողի փաստաբան Հովհաննես Չամսարյանը նշեց՝ միանշանակ ասել, որ ստեղծված իրավիճակը կոռուպցիոն դրսևորում է, իհարկե, հնարավոր չէ․ «Մշակույթի նախարարության «Մշակութային արժեքների փորձագիտական կենտրոն» ՊՈԱԿ-ի կողմից տրված եզրակացության մեջ տեղ գտած վերլուծություններից պարզ է դառնում, որ Մինաս Ավետիսյանի վրձնին վերագրվող նկարը այն աստիճան ակնհայտ կեղծ է, որ մասնագիտական անզեն աչքը պարզ ուսումնասիրության արդյունքում կարող է հայտնաբերել մի շարք հանգամանքներ, որոնց առկայությունը բացառում է տվյալ նկարի՝ Մինաս Ավետիսյանի վրձնին պատկանելը»,- նշեց Չամսարյանը՝ ընդգծելով, որ փորձագետները վստահեցնում են՝ նշված նկարը երբևէ ցուցադրված չի եղել որևէ տեղ, այն հայտնի չի եղել որպես Մինաս Ավետիսյանի ստեղծագործություն։