Կառավարությունը կվերանայի ստոմատոլոգիական ոլորտի հարկերը

Ստոմատոլոգիական ոլորտի բարեփոխումների և, մասնավորապես, հարկային քաղաքականության խնդիրների վերաբերյալ նոյեմբերի 23-ին տեղի ունեցավ հանդիպում-քննարկում՝ ոլորտի ներկայացուցիչների, հասարակական կազմակերպությունների, Առողջապահության նախարարության բժշկության օգնության գծով վարչության պետի մասնակցությամբ։

«Կառուցողական ստոմատոլոգիա» ՀԿ նախագահ Հովհաննես Գևորգյանը ներկայացրեց՝ այսօրվա արտոնագրային վճարի հարկաչափը չի բխում մանր և միջին կլինիկաների շահերից: Նա նշեց, որ ստացել են վարչապետ Փաշինյանին և Ֆինանսների նախարարին ուղղված նամակների պատասխանները, այն է՝ «համաձայն կառավարության քննարկումների և ծրագրերի՝ նպատակահարմար են գտնում փոփոխել արտոնագրային վճարը»։

Եղան ոլորտի մասնագետներ, որոնք հանդիպման ընթացքում դրական արտահայտվեցին հարկատեսակի վերացման և շրջհարկի կիրառության մասին, սակայն եղավ նաև հակառակ տեսակետը՝ այսինքն՝ համաձայն էին վճարել արտոնագրային վճար։

«Մենք 2013 թվականի Հունվարից պայքարում ենք և, ի վերջո՝ մեր ակնկալիքներն իրականանում են, հիմա պետք է հասցնենք վերջնակետին։ Կառավարությունը պատրաստ է ամբողջությամբ վերացնել հարկատեսակը, ինչը տեղի է ունենալու օրենսգրքի փոփոխությունից ժամանակ»,- ԼՈՒՐԵՐ․com-ի հետ զրույցում ասաց Հովհաննես Գևորգյանը

Ըստ Գևորգյանի՝ ողջամիտ հարկն այն է, որ մասնագետն ինչքան աշխատի՝ այնքան էլ հարկ վճարի, քանի որ ոլորտում չկա ստաբիլություն։ Գևորգյանի խոսքով՝ կան ստոմատոլոգիայի ոլորտի խոշոր ձեռնարկատերեր, որոնց համար շատ ավելի ձեռնտու է կլորիկ գումար վճարել և ազատվել հարկերից, իսկ թե փոքր և միջին ձեռնարկատերերն ինչ են անելու՝ նրանց դա այլ կերպ է հետաքրքրում։

«Արտոնագրային հարկատեսակը շրջհարկով փոխարինելուն դեմ արտահայտվողները նաև մեկ նպատակ են հետապնդում՝ օգտվել պատշաճ հարկատեսակից։ Մեր նպատակն է՝ հարկային տնտեսական համագործակցությունը լինի բարձր մակարդակի վրա: Մենք պատրաստ ենք հարկ վճարել, բայց այդ հարկաչափը պետք է ողջամիտ լինի»,- մանրամասնեց «Կառուցողական Ստոմատոլոգիա» ՀԿ նախագահ Հովհաննես Գևորգյանը և հավելեց, որ առաջիկայում կրկին մոտիվացիոն նամակ կգրի ՀՀ վարչապետին՝ ակնկալիքով, որ հրավեր կստանա՝ քննարկելու ոլորտում հարկատեսակի փոփոխության հարցը։

Արմինե Միքայելյան