Վրիպո՞ւմ, թե՞ գծված քաղաքականություն. ինչո՞ւ է արժեզրկվում արցախյան հաղթանակը
Վերլուծական
Համացանցում լայն քննարկման առիթ է հանդիսացել Թալինում նախընտրական հանդիպման ընթացքում ՔՊ վարչության նախագահ, «Իմ քայլը» դաշինքի համամասնական ցուցակի 7-րդ հորիզոնականը զբաղեցնող Սասուն Միքայելյանի հնչեցրած այն միտքը, թե թավշյա հեղափոխության հաղթանակն ավելի կարևոր էր, քան Արցախյան ազատամարտը: Եթե նման հայտարարություն աներ հեղափոխական թիմի երիտասարդ անդամներից՝ բանակում չծառայած և պատերազմի բովով չանցած մեկը, գուցե այս հայտարարությունը նման ռեզոնանսի չարժանանար: Սակայն արի ու տես, որ Արցախյան պատերազմում տարած հաղթանակը արժեզրկում է իշխանական կուսակցության վարչության նախագահը, պատերազմի մասնակից ու ԵԿՄ նախագահի հավակնություններ ունեցող գործիչը:
Անթույլատրելի է հեղափոխության հաղթանակը՝ պատերազմի դաշտում հազարավոր հայ քաջորդիների արյան գնով նվաճված հաղթանակի հետ նույն նժարին դնելը: Հարց է առաջանում՝ ինչո՞ւ են իշխանությունները արժեզրկում արցախյան հաղթանակը, սա պարզապես վրիպո՞ւմ էր, թե՞ կանխամտածված քաղաքականություն: Ըստ երևույթին՝ երկրորդը: Եվ այս քաղաքականության վառ դրսևորումներից մեկն էլ նոր իշխանությունների կողմից չափից դուրս հաճախ տիրաժավորվող խաղաղության կոչերն են: Տպավորություն է, որ հանրային տրամադրությունները գեներացնելու խնդիր է լուծվում, ընդ որում՝ իշխանության համար ցանկալի ուղղությամբ: Եթե նման գիծը քաղաքական օրակարգի մի մասն է, ապա հասկանալի է դառնում և՛ Սամվել Բաբայանի պասիվությունը, և՛ գեներալ Մանվել Գրիգորյանի դեմ հարուցված քրեական գործը: Արժեզրկվում է ոչ միայն հաղթանակը, այլև այդ հաղթանակը կերտողները: Ո՞ւմ է դա ձեռնտու և ինչո՞ւ: Եվ այս ողջ պատմության մեջ ամենավատն այն է, որ հրապարակներում հավաքված մարդիկ առանց իրենց հարց տալու՝ ինչի՞ համար է ասվում և արվում այս կամ այն քայլը՝ դըմփ-դըմփ-հու են անում ու ծափահարում:
Գուցե հենց սրա վրա են խաղադրույք արել նոր իշխանությունները, որ նրանց այսպես ասած, լեգիտիմությունը կազատի ձեռքերը նաև այնպիսի զգայուն հարցում, ինչպիսին է արցախյան հակամարտության կարգավորումը: ԱՄՆ նախագահի խորհրդական Ջոն Բոլթոնը Հայաստան պաշտոնական այցի ընթացքում հայտարարեց. «Նիկոլ Փաշինյանը դեկտեմբերի ընտրությունից հետո կունենա բավական ուժեղ դիրքեր՝ արցախյան բարդ և դժվարություններ ունեցող խնդրում առաջնորդություն անելու համար»: Արդյո՞ք նա չէր ակնարկում, որ խորհրդարանական ընտրություններից հետո ազատագրված տարածքների հանձնման, տարածաշրջանում նոր քաղաքական քարտեզի գծագրման և նոր զինված ուժերի ներկայության անհրաժեշտություն կառաջանա…
Ս.Խաչատրյան
ՈՒՂԻՂ ԵԹԵՐ
Ամենադիտված 
Ծնողները մահացել են, 3 երեխաները հիվանդանոցում են. նոր մանրամասներ ողբերգական վթարից
