Նիկոլ Փաշինյանը հետ չի մնում Սերժ Սարգսյանի «թրենդից»

Վերլուծական 27 Նոյեմբեր, 2018 17:41

Հայաստանի վարչապետի պաշտոնակատար Նիկոլ Փաշինյանն արդեն երկու օր է, ինչ բարձրաձայնում է Գյումրիում տեքստիլ գործարանի կառուցման ծրագրի մասին, որը կապահովի շուրջ 800 նոր աշխատատեղ: Ընդ որում, եթե նոյեմբերի 24-ին կազմակերպված երթի ժամանակ այդ թիվը 150-ն էր, ապա նախընտրական թափորի Գյումրի հասնելուն պես այդ թիվը ավելացավ՝ հասնելով 800-ի: Եվ այս ամենը դեռ ոչինչ, եթե վերոնշյալ գործարանը տարիներ շարունակ նախընտրական մանիպուլյացիաների կենտրոնում չգտնվեր: Բանն այն է, որ սա այն գործարանն է, որի մասին հայտարարել են Տիգրան Սարգսյանը, Հովիկ Աբրահամյանը, Կարեն Կարապետյանը, քարոզարշավներին ընդառաջ՝ նաեւ Սերժ Սարգսյանը: «Թրենդից» հետ չի մնում նաեւ Փաշինյանը: Իսկ գործարանը, ինչպես տեսնում ենք, այդպես էլ մնացել է բարի ցանկությունների և նախընտրական կենացների մակարդակում:

Կամ մեկ այլ օրինակ՝ ընտրություններից մեկ շաբաթ առաջ տարածված հաղորդագրության համաձայն, ստորագրվել է Երևան քաղաքի տարածքում 250 մեգավատտ հզորությամբ գազային վառելիքով կոմբինացված ցիկլով էլեկտրակայան կառուցելու վերաբերյալ «Փոփոխված և վերաշարադրված շրջանակային համաձայնագիրը» և «Փոփոխված և վերաշարադրված շրջանակային համաձայնագրին» հավելյալ համաձայնագիրը: Հաղորդագրության խորը ուսումնասիրությամբ հասկանում ենք, որ իրականում ընդամենը պայմանագրի փոփոխություն է տեղի ունեցել և նոր պայմանագրով ներդրումները կկազմեն ոչ թե շուրջ 285 մլն ԱՄՆ դոլար, այլ 250 մլն ԱՄՆ դոլար, և այլ ջերմաէլեկտրակայանների համեմատ՝ էլէներգիայի արժեքը կլինի ամենացածրը՝ 27,4 դրամ 1 կիլովատտ/ժամի համար։ ՋԷԿ-ի կառուցման համաձայնագիրը 2017-ին կնքել է դեռևս Վաչե Գաբրիելյանը, իսկ հիմնարկեքին ներկա է եղել Սերժ Սարգսյանը:

Ընդ որում, հիմնարկեքը տեղի է ունեցել խորհրդարանական ընտրություններից մեկ ամիս առաջ: Զուգադիպությո՞ւն է: Դժվար թե: Այն կուտը, որը ժամանակին հանրությանն էին հրամցնում նախկին իշխանությունները, այսօր հրամցնում է արդեն Նիկոլ Փաշինյանը: Սակայն դա էլ արդեն զարամանալի չէ՝ նույն Շիրակի մարզում ամեն նոր վարչապետի հետ աղբի, պահածոների գործարաններ էին բացում... էդպես էլ չբացվեցին...