Ականներ, որոնք շուտով կպայթեն

Վերլուծական 27 Նոյեմբեր, 2018 19:00

Ընտրություններին ընդառաջ, իշխանությունների համար անչափ կարևոր է դարձել վերականգնել հանրության՝ հեղափոխական օրերի էյֆորիկ տրամադրությունների վերականգնումը: Այո, ոչ թե պահպանումը, այլ հենց վերականգնումը, քանի որ վերջին օրերին իշխանությունների սակավամարդ երթերը և հանրահավաքները ի ցույց են դնում հանրային աջակցության սիստեմատիկ նվազումը:

Եթե չլինի որևէ շեղում գծված սցենարից, ապա ակնկալվում է, որ մոտ օրերս դաշտ կնետվեն հերթական աղմկահարույց բացահայտումները: Ամենայն հավանականությամբ, ի վերջո կհայտարարվի հայտնի սկանդալային ձայնագրությունների գաղտնալսման բացահայտման մասին: Թե դեպի ում կտանեն թելերը դրանից հետո և ով ի վերջո կհամարվի ձայնագրությունների պատվիրատուն՝ դժվար է ասել, սակայն ինչպես արդեն հասցրել են ակնարկել պատկան մարմինները՝ խոսքը շատ հայտնի գործչի մասին է:

ՀՀ երկրորդ նախագահ Ռոբերտ Քոչարյանի դատավարությունը նույնպես նոր փուլ կմտնի: Այսօր արդեն, դատական նիստին, որոշ տեղեկությունների համաձայն՝ ներկա է 6 դատախազ, ինչը աննախադեպ երևույթ է դատավարական պրակտիկայում, իսկ դա նշանակում է, որ իշխանությունները լրջորեն գործի են անցել և եթե ոչ այսօր, ապա ընտրություններին մոտ՝ Քոչարյանը կրկին կկալանավորվի: Սակայն կարելի է ենթադրել, որ կալանքը դարձյալ երկու ամսով կլինի, իսկ ընտրություններից հետո Քոչարյանը կրկին կարող է հայտնվել ազատության մեջ:

Չի բացառվում, որ ի վերջո կբացահայտվի նաև ԱԺ-ում Փաշինյանի մատնանշած հայտնի կոռուպցիոներ պատգամավորը: Հանրության շրջանում արդեն կասկած չկա, որ խոսքը վերաբերվում է Արամ Հարությունյանին՝ Բուլկի Արամին:

Երեկվա իր լայվերից մեկի ընթացքում Փաշինյանն ակնարկել էր նաև «սերմացու գողացող մկների» մասին: Կարծիք կա, որ այդ ակնարկն ուղղված էր նախկին վարչապետ Հովիկ Աբրահամյանին, հատկապես որ, վերջինիս ՀՔԾ-ն արդեն իսկ մեղադրանք է առաջադրել և երկրից չհեռանալու ստորագրություն վերցրել: Ինչ քայլերի էլ որ դիմեն իշխանությունները, դրանց մենք ականատես կլինենք մինչ ընտրությունները, քանի որ ընտրություններից հետո էյֆորիայի կարիք իշխանությունները թերևս չզգան, իսկ աղմկահարույց ձերբակալությունները և բացահայտումները դժվար թե ունենան այն նույն էֆեկտը, ինչպիսին կարող է լինել ընտրություններից երկու շաբաթ առաջ:

Ս.Խաչատրյան