Արտակարգ դեպք Շիրակի մարզի Արևիկ գյուղի դպրոցում. 7 տարեկան 2 աշակերտուհիներ ընկել են դպրոցի երկրորդ հարկից

Armtimes.com-ը գրում է․

Նոյեմբերի 27-ին, կեսօրն անց արտակարգ դեպք է տեղի ունեցել Շիրակի մարզի Արևիկ գյուղի դպրոցում: 7 տարեկան 2 աշակերտուհիներ՝ Մանե Նռանյանն ու Սյուզի Ավետիսյանն ընկել են դպրոցի երկրորդ հարկից և տեղափոխվել Գյումրու Ավստրիական մանկական հիվանդանոց: «Երեխաները եղել են հերթապահ և դասերի ավարտից հետո մնացել են, որ դասարանը մաքրեն: Դպրոցի մանկավարժները, նաև հավաքարարն ու պահակը տեղյակ չեն եղել, որ ներսում աշակերտներ կան, դպրոցի դուռը փակել, գնացել են: Երբ երեխաները գործն ավարտել են, փորձել են շենքից դուրս գալ: Դուռը փակ է եղել: Փոքրիկներն անհանգստացել, վախեցել են: Երկար ժամանակ երբ տեսել են, որ արձագանքող չկա, բացել են երկրորդ հարկի պատուհանն ու դուրս են ցատկել»:

Ավստրիական մանկական հիվանդանոց տեղափոխված 7 տարեկան Մանե Նռանյանն, ըստ հիվանդանոցի տնօրեն Աշոտ Կուրղինյանի, ունեցել է ուսահոդի կոտրվածք, վիրահատվել է, և գտնվում է հետվիրահատական շրջանում:

Արևիկի վարչական պատասխանատու Վարդկես Մելքոնյանը դեպքից տեղյակ չէ: «Ես էսօր Երևան եմ եղել, նոր եկել եմ: Հմի մի հատ գնամ երեխային տեսնեմ, գամ, կասեմ՝ ինչ է եղել, իսկ տնօրենի հետ դեռ չեմ խոսել»,-ՀԺ-ի հետ զրույցում ասաց Վարդգես Մելքոնյանը:

ՇՄ Կրթության, մշակույթի և սպորտի վարչության պետ Հրայր Կարապետյանը ևս դեպքից տեղյակ չէր: Ասաց՝ այս պահին արձակուրդում է, կզանգի, կճշտի:

ՀԺ-ի աղբյուրը նաև պատմել է, որ երեխաները հաճախ են հերթապահում, աշխատանքն ավարտելուց հետո դասարանը փակում, բանալին հետները տուն են տանում: Այսինքն, դասղեկը փոքրիկների հետ չի մնում դպրոցում, այնպես, ինչպես, օրինակ այսօր է եղել:

Ի դեպ, կան խոսակցություններ, որ դպրոցի տնօրենը տուժած երեխայի ծնողին ասել է, որ դեպքի մասին որևէ մեկին չպատմի, այլ բոլորին ասի, որ աղջիկն ուղղակի ընկել է: