Առուշ Առուշանյանը փորձում է փրկել աթոռը

Սյունիքի մարզի Գորիսի համայնքապետարանը որոշել է մասնակցել խորհրդարանական արտահերթ ընտրությունների նախընտրական քարոզչությանը։

Բանն այն է, որ համայնքապետարանը ֆեյսբուքյան իր պաշտոնական էջում գորիսեցիներին նախապես տեղեկացնում է վարչապետի պաշտոնակատար Նիկոլ Փաշինյանի այցի և ժամի մասին, ինչը վարչական ռեսուրսի կիրառման վառ օրինակ է։

«Հարգելի գորիսեցիներ, վաղը ՀՀ վարչապետ Նիկոլ Փաշինյանը կայցելի Սյունիք։ Ժամը 18.30-ին Գորիսի կենտրոնական հրապարակում Նիկոլ Փաշինյանը կհանդիպի գորիսեցիների հետ»,- գրված է Գորիսի համայնքապետարանի ֆեյսբուքյան էջում։

Հետաքրքրականն այն է, որ այսպիսի քարոչությամբ զբաղվում է ոչ թե այն համայնքապետարանը, որը ղեկավարում է «Իմ Քայլը» դաշինքի անդամը, այլ հենց ՀՀԿ-ական քաղաքապետ Առուշ Առուշանյանը։ Ի դեպ՝ Առուշանյանը վերջերս սկանդալային իրադարձությունների կիզակետում էր հայտնվել, երբ մամուլն ակտիվորեն սկսեց հրապարակել նրա և ավագանու անդամի միջև տեղի ունեցած ծեծկռտուքի մանրամասները։

Ինչպես նաև լուրեր են հրապարակվում, որ վարչապետի պաշտոնակատար Նիկոլ Փաշինյանը Գորիսի քաղաքապետի պաշտոնի համար նախատեսած քեկնածու ունի «Իմ Քայլը» դաշինքից և որ ՀՀԿ-ական Առուշ Առուշանյանի պաշտոնավարմանը շատ կարճ ժամանակ է մնացել։ Ստացվում է նաև, որ այս քայլով Առուշանյանն իր աջակցությունն է հայտնում Փաշինյանի թիմին՝ հավանաբար սեփական աթոռը պահելու համար։