Միևնույնն է՝ ռուսների սրտով չէ...

Վերլուծական 1 Դեկտեմբեր, 2018 17:30

Երեւանում՝ «Լազարյան ակումբի» նիստում, Պետդումայի ԱՊՀ եւ հայրենակիցների հետ կապերի հարցերով կոմիտեի նախագահի առաջին տեղակալ Կոնստանտին Զատուլինը այսօր ևս մեկ անգամ բարձրաձայնել է հայ-ռուսական հարաբերություններում վստահության մթնոլորտի ամրապնդման անհրաժեշտությունը: Բացի այդ, Զատուլինը ևս մեկ անչափ ուշագրավ դիտարկում է կատարել: Նա ընդգծել է, որ չնայած վարչապետի պաշտոնակատարի հայտարարություններին այն մասին, որ Հայաստանի եւ ՌԴ միջեւ հարաբերությունները երբեւէ այսքան արդյունավետ չեն եղել, գործնականում այլ իրավիճակ է. գործնականում նա սկսում է ՀԿԵ եւ «Գազպրոմի» գործունեության հետաքննություն:

Ի դեպ, սա առաջին դեպքն է, երբ ռուսական կողմը բարձրաձայնում է իր մտահոգությունները: Մինչ այդ, Փաշինյանը հայտարարում էր, որ Ռուսաստանը միայն ողջունում է կոռուպցիայի դեմ այն պայքարը, որը այսօր ծավալվում է Հայաստանում: Ընդ որում՝ Փաշինյանը նման հայտարարություն էր արել հենց ՀԿԵ-ի շուրջ ծագած սկանդալի ֆոնին և ՌԴ նախագահ Վլադիմիր Պուտինի հետ հանդիպումից անմիջապես հետո: Բանից պարզվում է, ռուսական կողմը ողջունում է, սակայն միայն այն պայքարը, որը շրջանցում է ռուսական կապիտալի տարածաշրջանային շահերը:

Տպավորություն է, որ ինչ էլ Փաշինյանը անի՝ միևնույն է ռուսական կողմի սրտով չէ: Այդ մասին են վկայում նաև ՌԴ արտգործնախարարի՝ դիվանագիտական փաթեթավորմամբ ներկայացվող կսմիթները, որոնցով ռուսական կողմը պարբերաբար իր դժգոհությունն է հայտնում Փաշինյանի գործողություններից, իհարկե՝ դա քողարկելով Հայաստանի հանդեպ ունեցած եղբայրական մեծ սիրով և դաշնակցի հանդեպ տածած հոգատարությամբ:

Պատրա՞ստ է արդյոք Փաշինյանը պայքարել կոռուպցիայի դեմ, այսպես ասած, տարբերակված, հաշվի առնելով նաև դաշնակիցների շահերը, թե՞ ՝ նախորդների համեմատ ավելի վճռական կգտնվի…

Ս.Խաչատրյան