Հավատացե՛ք, վստահե՛ք և պահանջե՛ք. Նորա Առուստամյան

ԱԺ պատգամավոր, ռեյտինգային ընտրակարգով «Բարգավաճ Հայաստան» կուսակցության կողմից Արագածոտնի մարզում առաջադրված պատգամավորի թեկնածու Նորա Առուստամյանը պատգամավորական գործունեության ընթացքում դարձել է 6 օրենսդրական նախաձեռնությունների համահեղինակ: Այժմ նա պատրաստվում է խորհրդարանական ընտրություններին` կիսատ մնացած ծրագրերը շարունակելու և նոր ծրագրեր իրագործելու համար: ԼՈՒՐԵՐ.com-ի թղթակցի հետ զրույցում երիտասարդ պատգամավորը խոսեց քարոզարշավի ընթացքի, նախընտրական ծրագրերի, առաջնային լուծում պահանջող խնդիրների և այլ հարցերի շուրջ:

-Տիկի′ն Առուստամյան, ինչպե՞ս եք գնահատում քարոզարշավի ընթացքը:

-Քարոզարշավի ընթացքը դրական եմ գնահատում: Յուրաքանչյուր քաղաքական ուժ` իր ծրագրերով, իր գծած ճանապարհով քարոզարշավ է իրականացնում: Մենք` ԲՀԿ Արագածոտնի մարզի իմ խումբը, բակային և համայնքային հանդիպումներ ենք ունենում` յուրաքանչյուրի հետ քննարկելով և ներկայացնելով ԲՀԿ նախընտրական ծրագրի հիմնադրույթներն ու կետերը:

-Ըստ շրջանառվող լուրերի`  նախկին գործելաոճը շարունակվում է. որոշ ուժեր ընտրակաշառք են առաջարկում կամ թաղային հեղինակությունների միջոցով փորձում են ձայներ հավաքել: Նման տեղեկություններ ունե՞ք:

-Այդ առումով, Արագածոտնի մարզն ունի դրական տեղաշարժ` դեպի ավելի քաղաքակիրթ քարոզչական աշխատանք իրականցնելը: Վերոնշյալ գործողությունները մեզ համար խորթ են ու անծանոթ:

-Խորհրդարան անցնելու դեպքում առաջիկա տարիներին ի՞նչ խնդիրների եք պատրաստվում անդրադառնալ:

-Նախևառաջ՝ կշարունակեմ ու ավարտին կհասցնեմ կիսատ թողած գործերը. օրենսդրական նախաձեռնություններ ունեինք, որոնք կիսատ են մնացել, պետք է շարունակենք: ԲՀԿ ծրագրի 15 կետերի իրականացումն էր ընթանում, հիմա ԲՀԿ նոր ծրագրի մեջ ներառել ենք նաև այդ կետերը, որոնք չենք հասցրել իրականացնել: Պատրաստվում եմ աշխատել այդ կետերի կյանքի կոչման շուրջ:

-Այս քարոզարշավը ինչո՞վ է տարբերվում նախորդից:

Այն ժամանակ օգնականի կարգավիճակից էի դարձել պատգամավորի  թեկնածու, այժմ` գործող պատգամավորի կարգավիճակից: Տարբերությունը փորձի ձեռքբերման հետ է կապված: Այս քարոզչության ընթացքում ինձ որոշ չափով ավելի փորձառու եմ համարում:

-Առաջադրվել եք Արագածոտնի մարզում, որպես ռեյտինգային թեկնածու, ինչո՞ւ պետք է Արագածոտնի բնակչությունը Ձեզ ընտրի, ո՞րն է Ձեր հաղթաթուղթը: 

Նախևառաջ, իմ հաղթաթուղթը Արագածոտնի մարզի Աշտարակ քաղաքից լինելն է: Նախորդ քարոզարշավի ժամանակ ինչ խոստումներ տվել եմ` իրականացրել եմ: Առաջին բանը, որ խոստացել էի` գրասենյակի ստեղծումն էր Աշտարակ քաղաքում: Գրասենյակը բացված է, յուրաքանչյուր հինգշաբթի գրասենյակում  քաղաքացիների ընդունելության օր է: Մարզի բնակիչները շատ լավ հասկանում և պատկերացնում են, որ իրենց բարձրացրած ոչ մի հարց օդում չի մնում ու որոշ ժամանակ անց համապատասխան լուծումը պարտադիր ստանում է:

-Ինչպիսի՞ խնդիրներ են լուծվել մինչ օրս:

Բոլորի համար առաջնային խնդիրը մարզի զարգացումն է: Ծրագիր, որով հնարավոր է մարզը զարգացնել, որովհետև այդքան մոտիկ մայրաքաղաքին և այդքան ամեն ինչից հետ` ճիշտ չէ: Սոցիալ-տնտեսական հարցերից մինչև մարզի զարգացման հարցեր՝ քննարկվում և լուծում են ստանում մեր գրասենյակում:

-Ի՞նչ կփոխանցեք Ձեր ընտրողին:

Հավատացե՛ք, վստահե՛ք և պահանջե՛ք: Այդ դեպքում միասին կունենանք բարգավաճ Հայաստան:

Հարցազրույցը՝ Արմինե Արմենակյանի