Մեր դեմ հակաքարոզչություն է իրականացվում․ Անի Սամսոնյան
Քաղաքական
«Նախընտրական շրջանում նկատելի եղան մեր դեմ հակաքարոզչական, սև PR-ի քայլեր, չեմ կարող ասել՝ որ քաղաքական ուժի կողմից, բայց ֆեյսբուքում տարածվում էին մեր դեմ ուղղված գովազդային հատուկ տեսահոլովակներ։ Մենք մեր աշխատանքով, վարքագծով հասցրել ենք ապացուցել, որ դրանք չեն համապատասխանում իրականությանը և անտարբեր ենք նման խոսակցություններին։ Որոշ մարզերում մեզ ասացին, որ մեր դեմ իրականացվում է հակաքարոզչություն, բայց փորձել ենք քայլեր ձեռնարկել և զգուշացնել բոլորին, որ որևէ մեկի ազատ կամքի նկատմամբ բռնություն չկիրառեն»,- այս մասին ԼՈւՐԵՐ․com-ի թղթակցի հետ զրույցում ասաց «Լուսավոր Հայաստան» կուսակցության պատգամավորի թեկնածու Անի Սամսոնյանը՝ խոսելով այս օրերին իրականացվող նախընտրական քարոզարշավի մասին։
Նա նկատեց՝ այս ընտրույթուններում և՛ իշխանական, և՛ մյուս քաղաքական ուժերն իրենք իրենց գերազանցել են պաստառների քանակով. փակցրել են գրեթե բոլոր տեղերում։ Մյուս ուժերի կողմից կա նաև արդարացում, որ դոմինանտ ուժը պաստառները փակցնում է բոլոր տեղերում՝ լայն տեսանելիություն ապահովելով և իրենց զրկելով այդ տեսանելիությունից։ Ըստ Սամսոնյանի՝ ԿԸՀ-ն պետք է գնահատական տա և միջամտի, որովհետև հստակ օրենք կա։
Անդրադառնալով այս օրերին տարբեր քաղաքական ուժերի կողմից միմյանց վրա ցեխ շպրտելու հանգամանքին՝ Սամսոնյանը նշեց, որ նախընտրական շրջանում մեկը մյուսի նկատմամբ առավելություն ստանալու և ավելի լավը երևալու խնդիր ունեն․ «Բնական է, որ ուժերը միմյանց նկատմամբ հնչեցնեն մեղադրանքներ, հիշեցնեն անցյալը։ Սակայն այս պահին առավել կարևոր է, թե հասարակությունն ինչպիսի խորհրդարան է ուզում ունենալ՝ հին ուժերի՞ց, որոնք իրենց սպառել են և հույս չկա նրանցից, որովհետև նրանք կոալիցիայի մեջ են եղել ՀՀԿ-ի հետ, ունեցել են հուշագրեր, կողմ են քվեարկել Սերժ Սարգսյանի երրորդ պաշտոնավարմանը։ Կարևոր է, որ հասարակությունը հասկանա՝ նրանք սպառել են թե՛ հանրության վստահությունը, թե՛ իրենց գաղափարական ռեսուրսները և կանաչ լույս չվառի նրանց համար դեպի պետական ինստիտուտներ»,- նշեց նա։
Տեղեկություններին՝ որոշ քաղաքական ուժերի կողմից, տարբեր միջոցներով, ձայներ հավաքելու գործընթացներ են իրականացվում, Սամսոնյանն արձագանքեց, որ նման խոսակցություններ լսել է, բայց փաստեր չունի․ «Բնական է՝ հեղափոխությունից հետո մարդկանց արժեհամակարգը միանգամից չէր փոխվելու, իսկ այդ երևույթը պետք է վերացնենք աստիճանաբար։ Այն ուժերը, որոնք ընդունում են այդ ծառայությունները, պետք է գիտակցեն, որ դա պետություն կայացնելու գործում վնաս է հասցնելու ընտրական ինստիտուտին»։
Նրա խոսքով՝ առաջին խնդիրը, որն առաջնահերթ լուծում է պահանջում, հարկային օրենսգրքի փոփոխությունն է, հաջորդը՝ Աշխատանքային օրենսգրքինը, ուստի՝ խորհրդարանում հանդես են գալու հենց այս նախաձեռնություններով։
Երեկ հայտնի դարձավ, որ Երևան քաղաքի կենտրոնական հրապարակում տեղադրվելու է նոր տոնածառ, ինչին Սամսոնյանը դեմ էր արտահայտվել՝ նշելով, որ այդ գումարով այլ խնդիրներ կարելի է լուծել, որոնք հրատապ են․ «Այս պահին 71 մլն դոլարանոց տոնածառ գնելը շռայլություն է։ Ինքս էլ ուզում եմ, որ քաղաքում լինի նոր տոնածառ, նոր խաղալիքներ, բայց դրա հետ մեկտեղ՝ մենք ունենք կուտակված բազում խնդիրներ։ Այս պայմաններում, երբ մենք չենք կարողանում որոշել՝ ո՞րն է մեզ համար առաջնահերթություն՝ գեղագիտական հաճույքը, թե որևէ խնդիր լուծելը քաղաքի համար, ես կարծում եմ, որ դա անընդունելի է։ Կարելի էր շարունակել հին ավանդույթը և երբ կլինեին ավել միջոցներ, այդ ժամանակ կգնեինք նոր տոնածառ»,- ընդգծեց նա՝ ավելացնելով, որ այս հարցում որևէ հրատապության հարց չկար։
Սոնա Հարությունյան
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
