Կրակոց Արցախի ուղղությա՞մբ, թե՞ ՀՀԿ-ի լարած ծուղակը
Վերլուծական
ՀՀԿ համամասնական ցուցակի երրորդ համար Դավիթ Շահնազարյանն այսօր հրատապ մամուլի ասուլիս էր հրավիրել, որտեղ հանդես եկավ հայտարարությամբ: Հայտարարությունը, ի դեպ, պետք է արվեր ԱԱԾ-ում, ուր Շահնազարյանին այսօր հրավիրել էին, սակայն վերջինս որոշել է իր ասելիքը տեղ հասցնել հանրայնորեն: Փաստացի, Շահնազարյանը օգտվեց առիթից և ևս մեկ անգամ կրկնեց երեկվա ասուլիսում հնչեցրած իր սկանդալային բացահայտումը: Հիշեցնենք՝ Շահնազարյանը Սասուն Միքայելյանին էր մեղադրել Օմարի բարձունքի հանձման մեջ և փաստել, որ հենց նա էր այն անձը, ում ցանկանում էր գնդակահարել Վազգեն Սարգսյանը:
Սակայն, ըստ երևութին, Շահնազարյանին ԱԱԾ էին հրավիրել բացատրություններ տալու դեռևս նոյեմբեր ամսին արված իր այն հայտարարության համար, որում նա ներկայիս իշխանություններին համարել էր արտաքին ուժի պրոյեկտ, որը իշխանություն է ստացել Արցախի դիմաց, և որ Սասուն Միքայելյանի սկանդալային վրիպումը ոչ թե լեզվի սայթաքում էր, այլ իշխանությունների հստակ գծված քաղաքական գիծը: Դրանից հետո վարչապետի պաշտոնակատար Նիկոլ Փաշինյանը հայտարարել էր, որ ԱԱԾ-ն պետք է կանչի նրանց, ովքեր ասում են՝ «հեղափոխությունը Արցախը հանձնելու համար էր»»: Շահնազարյանի հրավերը ԱԱԾ` ըստ էության` տեղավորվում է հենց Փաշինյանի արված հայտարարության համատեքստում: Եվ հենց այդ հայտարարությանը հղում անելով` Շահնազարյանը պնդում է, որ իր դեմ ներկա իշխանությունների կողմից քաղաքական հետապնդում է իրականացվում:
Սակայն ի՞նչ խնդիրների կարող է բախվել Փաշինյանը: Ակնհայտ է, որ այս հեռակա դիսկուրսը ՀՀԿ-ն ցանկանում է տանել ոչ թե իրավական, այլ հանրային դաշտում՝ ապահովելով առավելագույն ռեզոնանս` դաշտ նետվող նորանոր «բացահայտումների» համար: ՀՀԿ-ի նման մարտավարությունը վտանգավոր է այնքանով, որ Փաշինյանի ցանկացած կտրուկ քայլ՝ կարող է ՀՀ երկրորդ նախագահ Ռոբերտ Քոչարյանի պատմության կրկնությունը դառնալ, և այստեղ հարց է առաջանում՝ արդյո՞ք նման սցենարը ձեռնտու է Փաշինյանին, հաշվի առնելով, որ ՀՀԿ-ն կանխամտածված կերպով ցանկանում է ստանձնել քաղհալածյալի դերը և այն միջազգային աղմուկը, որը կբարձրանա՝ այդ թվում ՀՀԿ ջանքերի շնորհիվ:
Այն, որ Փաշինյանը հասկանում է այս պոտենցիալ ռիսկերը, ակնհայտ է. դրա մասին է խոսում նաև այն փաստը, որ ԱԱԾ-ն ոչ թե ծանուցագիր, այլ ընդամենը հրավեր էր ուղարկել Շահնազարյանին: Սա նշանակում է, որ Փաշինյանը մի կողմից՝ չի ցանկանում խաղալ ՀՀԿ թելադրած խաղի կանոններով, մյուս կողմից էլ՝ նորանոր բացահայտումների ռիսկը առկա է, իսկ այդ հարվածները եթե մահացու չեն Նիկոլ Փաշինյանի թիմի համար, այնուամենայնիվ, ազդում են հանրային տրամադրությունների վրա:
Ինչպես կվարվի Փաշինյանը՝ ցույց կտա ժամանակը…
Ս.Խաչատրյան
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
