Գումարի տեսքով մրցանակ՝ պարկեշտությունից զուրկ ստեղծագործությունների համար

Երեւանում օրերս տեղի ունեցած «Գրքի երևանյան երկրորդ փառատոնի» շրջանակներում կայացավ «Արձակ» և «Պոեզիա» անվանակարգերում ամենամյա գրական մրցանակաբաշխությունը: «Պոեզիա» անվանակարգում Առաջին մրցանակը տրամադրվեց բանաստեղծ Վիոլետ Գրիգորյանին՝ 600.000 դրամի տեսքով:

Այս լուրը ոչ միանշանակ է ընդունվել հասարակության լայն շերտերի մոտ. նշվում է, որ Գրիգորյանը հայհոյախառն և գռեհիկ բառապաշար է օգտագործում իր ստեղծագործություններում, այդպիսով նպաստելով այլասերվածության քարոզին: Սլաքները հիմնականում ուղղվում են մշակույթի նախարար Լիլիթ Մակունցի կողմը, քանի որ վերջինս այդ 600.000-ը հատկացրել է պետական բյուջեից:

Մշակույթի նախարարության լրատվության ծառայությունից ԼՈՒՐԵՐ.com-ի հետ զրույցում նշեցին, որ Մշակույթի նախարարության կազմակերպչական թիմը մասնագիտական խորհրդի համաձայնությամբ ամիսներ առաջ մրցույթ էր հայտարարել և ստացել էր 167 հայտ. 80-ը «Պոեզիա», 87-ը՝ «Արձակ» անվանակարգում:

«Մասնագիտական խորհուրդն, անաչառ քննելով «Պոեզիա» անվանակարգի հայտերը, իրենց գնահատականներն առանձին ուղարկելով, պարզ հաշվարկով ձայները գումարվել են իրար և արդյունքում հաղթող է ճանաչվել Վիոլետ Գրիգորյանը: Որևէ քննարկում չի եղել»,- մեզ փոխանցեցին Մշակույթի նախարարությունից: 

Մեր այն դիտարկմանը, որ Վիոլետ Գրիգորյանի ստեղծագործությունները ընթերցասերների մի մասի համար տհաճ են հենց բառապաշարի պատճառով, այս դեպքում ինչպե՞ս է մասնագիտական խորհուրդը գնահատում դա և արդյո՞ք հաշվի են առնվել անպարկեշտ գրվածքները, նախարարության մամուլի ծառայությունից փոխանցեցին, որ խորհուրդը քննարկել է միայն այն գործերը, որոնք ուղարկվել են մրցույթի համար. «Հաշվի չեն առնվում ստեղծագործողի այլ գրվածքներ»:

Վերջում նշենք, որ Վիոլետ Գրիգորյանն ընդգրկված է Մշակույթի նախարարությանը կից ստեղծված խորհրդում և ստացվում է, որ նման ստեղծագործությունների հեղինակներից կազմված խումբն է զբաղվում ՀՀ Մշակույթի նախարարի խորհրդատվությամբ: