Սամվել Ալեքսանյանի կեղծ օղիները բռնագրավվել են

ԱԺ պատգամավոր Սամվել Ալեքսանյանին պատկանող «Ալեքս Գրիգ» ընկերության արտադրած օղիների կեղծ խմբաքանակը, որոնք նմանեցված են ռուսական ու ուկրաինական հայտնի ընկերությունների արտադրանքին, Արդարադատության նախարարության դատական ակտերի հարկադիր կատարման ծառայությունը (ԴԱՀԿ-ն) վաճառքից արդեն հանել է:

Այսօր նախարարությունում տեղի ունեցած ասուլիսում այս մասին հայտնեց ԴԱՀԿ ծառայության պետ Միհրան Պողոսյանը: «Ալեքս Գրիգի» օրինախախտունը հայտնաբերել էր Տնտեսական մրցակցության պաշտպանության պետական հանձնաժողովը, ինչի համար տնտեսվարողը տուգանվել է:

Առգրավվել են նաև պիտակները և խցանները: Պարոն Պողոսյանի խոսքերով, սակայն, այս գործով վարույթը չեն կարճել, քանի որ ըստ նրա՝ չի բացառվում, որ «արտադրությունը կարող է ցանկացած ժամանակ վերսկսվել»:

Նշենք, որ ՀՀ տնտեսական մրցակցության պաշտպանության պետական հանձնաժողովը տարբեր ժամանակահատվածներում մի քանի անգամ տուգանել է պատգամավոր Սամվել Ալեքսանյանին պատկանող «Ալեքս Գրիգ» ընկերությանը՝ ռուսական և ուկրաինական օղիների վրա զետեղված ապրանքային նշանները ապօրինաբար ընդօրինակելու և սպառողներին շփոթության մեջ գցելու համար: Խոսք է գնում, մասնավորապես, «Ալեքս Գրիգի» կողմից արտադրվող հետևյալ օղիների մասին՝ «Զելյոնայա Մետկա», «Ռուդնիկ», «Ուկրաինա», «Խլոպցի», «Մեդոֆ», «Պրեմիում», «Խլեբնիյ Դար», «Պառլամենտ», «Ռուսսկիյ Բրիլլիանտ», «Բուֆետնայա Տրադիցիա»: