Հայաստանում կներդրվի հարմոնիզացված սպառողական գների ինդեքսների համակարգ

Այսօր Երևանում տեղի է ունեցել սեմինար «Հարմոնիզացված սպառողական գների ինդեքսի (ՀՍԳԻ) ներդրումը Հայաստանում» թեմայով: Սեմինարն անց է կացվել ԵՄ Թվինինգ ծրագրի և Հայաստանի ազգային վիճակագրական ծառայության միջոցներով:

ԱՎԾ-ի տնօրեն Ստեփան Մնացականյանը իր ողջույնի խոսքում իր շնորհակալությունն է հայտնել Թվինինգ ծրագրի մշտական խորհրդատու Թոմաս Բիին, Լիտվայի Վիճակագրական Գների բաժնի պետ Նադեժդա Ալեյեվային և Լատվիայի Վիճակագրական Կենտրոնական Բյուրոյի Գների վիճակագրության բաժնի պետ Օսկարս Ալկսնիսին Հայաստան ժամանելու և սեմինարին մասնակցելու համար:

Հարմոնիզացված սպառողական գների ինդեքսը (ՀՍԳԻ) ԵՄ երկրների կողմից հաշվարկվող ինդեքսներ են, որոնք խարսխված են ընդհանուր մեթոդաբանության և սահմանումների միասնական փաթեթի սկզբունքներին: Ինչպես հետևում է անվանումից, այն միտված է Եվրամիության անդամ բոլոր երկրների սպառողական գների ինդեքսների համընդգրկուն հարմոնիզացմանը:

Ինչպես Նշեց Ստեփան Մնացականյանը, ՀՍԳԻ համակարգը օգտագործվում է ԵՄ-ի 27 երկրներում: Նրանք հրապարակում են ինչպես Սպառողական Գների Ինդեքսները(ՍԳԻ), այնպես էլ ՀՍԳԻ տվյալները: Հայաստանում ՀՍԳԻ ներդրումը կարևոր քայլ է ԵՄ ստանդարտներին համապատասխանելու համար և հնարավոր է, որ դա տեղի ունենա 2013 թ.-ի սկզբին:

ՀՍԳԻ-ն արդեն իսկ կիրառվում է ԵՄ-ի 27 երկրներում: