ՀՀ գյուղատնտեսության նախարարն այցելեց «ԲԻԳԱ» ՍՊԸ

Սակավահող Հայաստանի գյուղատնտեսությունը պարենային ապրանքների արտադրության ծավալներով չի կարող մրցակցել հարևանների հետ: Սակայն էկոլոգիապես մաքուր արտադրության կազմակերպումը հնարավորություն կտա դուրս գալ մրցակցային շուկա, սպառողին ներկայացնելով պարենային այնպիսի մթերքներ, որոնց պահանջարկն այսօր մեծ է ամբողջ աշխարհում: Էկոլոգիապես մաքուր արտադրանքի ուղղությամբ Հայաստանում առաջին քայլերն են կատարվում և առաջամարտիկներից մեկը՝ «ԲԻԳԱ» ՍՊԸ-ն է, որը Կոտայքի մարզի Ակունք համայնքի 9 հա հողատարծքի վրա գործունեություն է ծավալել 2010 թվականից: Նպատակը մեծ պահանջարկ վայելող հատապտուղների՝ ազնվամորու, մոշի, հաղարջի մշակության կազմակերպումն է մեզանում:

Այսօր՝ հուլիսի 18-ին, ՀՀ գյուղատնտեսության նախարար Սերգո Կարապետյանն այցելեց նորաստեղծ տնտեսություն, ծանոթացավ վերջինիս գործունեությանն ու հեռանկարներին:

Ծանոթություններ էր տալիս ՍՊԸ-ի տնօրեն Ռաֆիկ Եգանյանը, որը ներկայացրեց այստեղ կիրառվող ագրոտեխնիկական նոր սարքավորումները, մասնավորապես կաթիլային ոռոգման համակարգը ու նրա առավելությունները: Վերջիններս հնարավորություն են տալիս հա-ի միջին բերքատվությունը հասցնել 10-15 տոննայի: Սա բարձր ցուցանիշ է, սակայն իրացման մտահոգություններ տնտեսությունում չունեն, որովհետև ըստ տնօրենի, իրենց ողջ արտադրանքն արդեն կայուն սպառող ու հասցեատեր ունի՝ Արաբական Միացյալ Էմիրաթները:

2013 թվականին նախատեսվում է կազմակերպել նաև ելակի մշակություն, որին կհատկացվի 2 հա տարածք: Այստեղ նույնպես հա-ի միջին բերքատվությունը բարձր կլինի՝ շուրջ 50 տոննա: Հատապտղից բացի ընկերությունը փակ գրունատային պայմաններում զբաղվում է նաև սնկի և բանջարենի առանձին տեսակների արտադրությամբ: