ՀՀ ներքին շուկայական կարգավորումները 2012թ.-ի առաջին կիսամյակում

Տնտեսություն 24 Հուլիս, 2012 21:32

2012թ.-ի առաջին կիսամյակում ստորագրվել է «Սպառողների իրավունքների պաշտպանության ոլորտում Անկախ Պետությունների Համագործակցության անդամ պետությունների համագործակցության հիմնական ուղղությունների մասին 2000 թվականի հունվարի 25-ի Համաձայնագրի մեջ փոփոխություններ կատարելու մասին» արձանագրությունը, որը նախատեսում է ԱՊՀ անդամ պետություններում ձևավորել սպառողների իրավունքների պաշտպանության միասնական համակարգ:

Մշակվել և ՀՀ Ազգային ժողովի քննարկմանն է ներկայացվել «Առևտրի և ծառայությունների մասին» Հայաստանի Հանրապետության օրենքում լրացումներ կատարելու մասին» ՀՀ օրենքի նախագծի փաթեթը, որը ուղղված է.

• սահմանել խոշոր առևտրի օբյեկտների տեղակայման (վերակառուցման) քաղաքաշինական չափորոշիչները,
• կանխել տնտեսական մրցակցության անհավասար պայմանների դրսևորումները,
• ապահովել փոքր և միջին առևտրային օբյեկտների շահերի պաշտպանությունը:

Մշակվել և ընդունվել են 2011 թվականին ընդունկած «Ներքին շուկայի պաշտպանության մասին» Հայաստանի Հանրապետության օրենքում փոփոխություններ և լրացումներ կատարելու մասին՝ ՀՀ օրենքի կիրառումն ապահովող ենթաօրենսդրական ակտեր մասնավորապես՝ օղի ներմուծողների լիցենզավորման կարգը:

2012 թվականին մայիսի 24-ին Հայաստանի Հանրապետության կառավարության հավանության է արժանացել «Հայաստանի Հանրապետությունում թանկարժեք մետաղների բնագավառի կարգավորման և զարգացման մասին» հայեցակարգը և դրանից բխող միջոցառումերի ծրագիրը: Փաստաթուղթը նախատեսում է Հայաստանում ներդնել միջազգային մասնավորապես՝ Եվրոպական ստանդարտներին համապատասխան ոսկերչական ապրանքների արտադրության հանդեպ պահանջներ, որոնց ներդրումը թույլ կտա հայ ոսկերիչներին ավելի նպաստավոր պայմաններում հանդես գալ ու կայուն դիրքեր գրավել միջազգային շուկաներում: