Ընդունվել են, սակայն չեն կարող սովորել. Ֆիզմաթ դպրոցում ազատ դասարան չկա

Արտաշես Շահինյանի անվան ֆիզիկամաթեմատիկական հատուկ դպրոցի դիմորդների ծնողները դժգոհում են. ընդունելության քննություններին անցողիկ շեմը հաղթահարած երեխաները չեն կարողանալու սովորել դպրոցում՝ դասարան չլինելու պատճառով։ Այս մասին ԼՈՒՐԵՐ․com-ին պատմեց դիմորդներից մեկի ծնողը։ 

Նա նշեց՝ ամեն տարի նման խնդիր է առաջանում, պետք է լինի 7-րդ և 8-րդ 2-ական դասարան, բայց դիմորդների մեծ թվի հետևանքով ևս մեկական դասարան բացելու անհրաժեշտություն է առաջանում․ «Ամեն տարի մեկ դասարան ավելացվել է, իսկ այս տարի տնօրենը կտրականապես հրաժարվում է բացել՝ պատճառաբանելով, թե պայմաններ և ազատ դասարան չկա։ Առաջին տարին է, երբ երեխաները նման բարձր արդյունքներ են գրանցել, և անցողիկ շեմն էլ ավելի բարձր է եղել։ Արդյունքում, ֆիզիկամաթեմատիկական առարկաներից արտակարգ ընդունակություններ ունեցող, ֆիզմաթ դպրոցի ընդունելության քննություններից բարձր միավորներ ստացած աշակերտները զրկվում են ֆիզմաթ դպրոցում սովորելու հնարավորությունից»,- ասաց նա: 

Ծնողի խոսքով՝ Ֆիզմաթի տնօրեն Հայկազ Նավասարդյանը պատճառաբանում է նաև, թե հավելյալ դասարան բացելու համար ԿԳ նախարարությունը լիցենզիա չի տալիս, սակայն իրենք դիմել են նախարարություն, այստեղից փոխանցել են՝ եթե տնօրենը դիմի իրենց և ասի, որ տարածք ունի՝ լիցենզիա կտան․ «Ստացվում է՝ մեկը մյուսի վրա է գցում, և խնդրին լուծում չի տրվում։ Սակայն Ֆիզմաթին կից գտնվում է «Ուսում» հանրակրթական դպրոց ոչ պետական ուսումնական հաստատությունը, որի ղեկավարը ֆիզմաթ դպրոցի տնօրեն Հայկազ Նավասարդյանի կինն է` Սուսաննա Թամարյանը։ Այս մասնավոր դպրոցի տարածքը Ֆիզմաթը տարեկան 10 000 մլն դրամով վարձով  է տվել։ Խնդիրը կլուծվի, եթե տնօրենը ընդամենը մեկ դասարան հետ վերցնի տվյալ հաստատությունից, որպեսզի փայլուն գիտելիքներով երեխաները դուրս չմնան։ Այսինքն՝ տարածքը կա, պարզապես վարձով տրված է այլ հաստատության։ Մեզ մոտ հարց է առաջանում, թե ինչն է պատճառը, որ այս տարի տարածք չի տրամադրվում մեկ ավել դասարան ունենալու համար, այն դեպքում, երբ նախորդ բոլոր տարիներին կարողացել են գտնել տարածք»,- մտահոգություն հայտնեց դիմորդի ծնողը։ 

Նրա փոխանցմամբ՝ դիմել են նաև ՀՀ կրթության, գիտության, մշակույթի և սպորտի նախարար Արայիկ Հարությունյանին, հույս ունեն, որ խնդրին լուծում կտրվի։ Խնդրում են, որպեսզի վերականգնվի Ֆիզմաթ դպրոց ընդունվելու հետ կապված արդարությունը և հնարավորություն ընձեռվի ֆիզիկամաթեմատիկական առարկաներից բարձր առաջադիմությամբ աշակերտներին սովորել այնտեղ: Այս տարի հավելյալ 2 դասարան բացել՝ մեկ 7-րդ և մեկ 8-րդ, իսկ ապագայում ամբողջությամբ վերանայել տվյալ դպրոցի ընդունելությունը, ուսուցման պրոցեսներն արդիականացնել ու բարելավել պայմանները: