Խաչատուրյան քույրերից մեկի փաստաբանը հայտարարել է նրանց ցուցմունքների կեղծված լինելու հավանականության մասին

Մոսկվայում իրենց հոր սպանության մեջ մեղադրվող Խաչատուրյան քույրերից մեկի դատապաշտպանը հայտարարել է, որ նրանց կողմից իրենց հոր սպանության գործով ցուցմունքները կարող են հարցաքննության ժամանակ կեղծված լինել, գրում է tass.ru-ն:

Հաղորդվում է, որ պաշտպանյալ կողմը Քննչական կոմիտեին 2018թ.-ի հուլիսի 28-ին և 29-ին քույրերի առաջին ցուցմունքի համար հեղինակային փորձաքննություն իրականացնելու միջնորդություն կներկայացնի:

Դատապաշտպանը վկայակոչել է փորձագիտական հետաքննությունը, որով պարզ էր դարձել, որ աղջիկների հարցաքննության բոլոր երեք արձանագրությունները գործնականում ամբողջությամբ նույնն են, ինչպես նաև հավելել, որ բոլոր արձանագրությունները գրված են մեկ մարդու կողմից:

Փաստաբանի կարծիքով՝ նախ կազմվել է Մարիայի ցուցմունքը, ապա Անգելինայինը և հաջորդիվ Քրիստինայինը, այն դեպքում, որ Մարիան դատաքննության ժամանակ հոր՝ Միխայիլ Խաչատուրյանի սպանության պահին անմեղսագիտակ է ճանաչվել, ինչը նշանակում է, որ նա չէր կարող սպանության օրվա իրադարձությունների վերաբերյալ ցուցմունք տալ:

Եթե միջնորդությունը բավարարվի, այն ցուցմունքները, որոնց հիման վրա քույրերին մեղադրանք է առաջադրվել, անվավեր կճանաչվեն:

Հիշեցնենք, որ 57-ամյա Միխայիլ Խաչատուրյանը 2018 թ. հուլիսին սպանված էր հայտնաբերվել իր մոսկովյան տանը: Նրա դիակի վրա հայտնաբերվել էին բազմաթիվ վնասվածքներ: Տղամարդու 19, 18 և 17 տարեկան դուստրերը` Մարիա, Անգելինա և Քրիստինա Խաչատուրյանները, ձերբակալվել են:

Նշվում է, որ սպանվածը՝ Միխայիլ Խաչատուրյանը, տարիներ շարունակ երեք քույրերին ենթարկել է ֆիզիկական և սեռական բռնության: Քույրերի պաշտպանությունը, ինչպես նաև հանրությունը պնդում են, որ աղջիկների գործողությունները կրել են ինքնապաշտպանական բնույթ և չեն կարող դիտարկվել որպես նախապես պայմանավորված խմբակային հանցագործություն: