Վանաձորի խանութներում մի շարք կասկածելի սննդամթերք է հայտնաբերվել

Տնտեսական մրցակցության պաշտպանության պետական հանձնաժողովը մարզեր այցելության շրջանակներում, այսօր՝ հուլիսի 24-ին, այցելել է Վանաձոր, շրջել մարզկենտրոնի առավել խոշոր խանութներում, որի նպատակն առկա խնդիրներին ծանոթանալն ու դրանց համապատասխան լուծումներ տալն էր: Աշխատակիցները լրագրողների հետ շրջեցին Վանաձորի կենտրոնական հատվածում գտնվող առավել խոշոր խանութներում, ուշադրության կենտրոնում էին հատկապես առաջին անհրաժեշտության ապրանքները:

Հսկիչ գնումներ կատարելուց հետո աշխատակիցները հայտաբերված խախտումների վերաբերյալ տեղում կազմեցին համապատասխան արձանագրություններ: Վանաձորի Գրիգոր Լուսավորիչ հասցեում գտնվող «Գրին Պլազա» խանութում աշխատակիցները հսկիչ գնումներ կատարեցին ռուսական կարագ անվան տակ դրված եւ 1400 դրամ գին ունեցող կարագից, որի գինը կասկած հարուցեց, քանի որ ըստ նրանց, փորձը ցույց է տալիս, որ նման գնի տակ վաճառվող կարագը իրականում սփրեդ է, սակայն վաճառվում է կարագի անվան տակ:

Խանութներից հիմնականում հսկիչ գնումներ կատարվեցին կաթնամթերքից, ձվից ու մսեղենից, որոնց վրա հիմնականում բացակայում էին արտադրման տարեթիվն ու պահպանման ժամկետները: Աշխատակիցները ստուգայց իրականացրեցին նաեւ Վանաձորում գտնվող ՍԱՆԻ-ՍԻԹԻ/նախկին ՎԱԲԱ/ սուպերմարկետում, որը պատկանում է ԱԺ պատգամավոր Վահրամ Բաղդասարյանին, սակայն ըստ մամուլում շրջանառվող տեղեկությունների, այն մինչ ընտրությունները Բաղդասարյանը «վերեւներին» է նվիրել, նրանց «դաբրոն» ստանալու համար: Այնտեղ եւս խախտումներ արձանագրվեցին:

Լրագրողների հետ զրույցում ՏՄՊՊՀ նախագահ Արտակ Շաբոյանի փոխանցմամբ, մարզերից բողոքներ հիմնականում իրենք չեն ստանում, իսկ ստացված գրությունները հիմնականում վերաբերում են Երեւանին: «Թեեւ ես համոզված եմ, որ մարզերում եւս մի շարք խնդիրներ կան ու այսպիսի այցերի ընթացքում մենք ուզում ենք մեր գործունեությունն ակտիվացնել, մարզերում եւս մեծացնենք վստահությունը մեր հանձանաժողովի նկատմամբ»,-ասաց նա:

Հայտնաբերված խախտումների առնչությամբ կազմված արձանագրությունների փաստերի հետ կապված կկատարվեն վերլուծություններ, արդյունքների մասին կտրվի տեղեկատվություն: Վանաձորցիները իրականացված ստուգումների մասին լսելով նշում էին, որ նմանատիպ ստուգումները պետք է ոչ թե մի քանի տարին մեկ լինեն, այլ ամեն ամիս, քանի որ մարզերում վիճակը դարձել է անվերահսկելի, ու իրենց վաճառում են ամեն տեսակի ժամկետանց ու անորակ սնունդ:

News.am