Այս տարի արտահանվել է 12,130 տոննա ծիրան

Այսօր լրագրողների հետ հանդիպման ժամանակ գյուղատնտեսության նախարար Սերգո Կարապետյանը ներկայացրեց 2012թ. առաջին կիսամյակում գյուղատնտեսության ոլորտում առկա ձեռքբերումները և առաջիկա սպասելիքները: Նախարարի խոսքերով, հանրապետության ղեկավարության կողմից ձեռնարկած միջոցառումների շնորհիվ լավ հիմքեր են ստեղծվել գյուղատնտեսության զարգացման համար:

«Ազգային վիճակագրական ծառայության առաջին կիսամյակի արդյունքները գյուղատնտեսության մասով համախառն ներքին արտադրանքի ծավալը կազմում է 203 մլրդ 600 մլն դրամ, ինչը նախորդ տարվա նույն ժամանակահատվածի համեմատ ավելացել է 8.1%-ով: Եթե վերլուծենք գյուղատնտեսության ոլորտի զարգացման դինամիկան, ապա ամենաշատ աճը մենք արձանագրել ենք բուսաբուծության՝ 28% և անասնապահության ոլորտներում՝ 2%:
Տարևերջին Հայաստանի գյուղատնտեսության բնագավառում նախնական օպերատիվ տվյալներով նախատեսվում է 8-9%-ի աճ»:

Նախարարաի խոսքերով, հատկապես մեծ են ձեռքբերումները պտղաբուծության ոլորտում, մասնավորապես անցած տարվա 7300 տոննայի փոխարեն, այս տարի արտահանվել է 12.130 տոննա ծիրան: «Եթե վերամշակող կազմակերպությունների կողմից անցած տարի մթերվել է 2,830 տոննա ծիրան, ապա այս տարի այդ ցուցանիշը հասնում է 6.150 տոննայի: Բերքահավաքը բարձր գոտիներում դեռ շարունակվում է և այդ թվերը աճի միտում ունեն»: Նախարարը գոհ է նաև դեղձի և խնձորի բերքատվությունից, ինչպես նաեւ խաղողի սպասվելիք բերքից:

ՍերգոԿարապետյանը նշեց, որ մտահոգություններ կան մշակաբույսերի հետ, որտեղ դեռևս առկա են դժվարություններ. «Ընդհանուր առմամբ մեր ամենամեծ ձեռքբերումը ես համարում եմ այս տարվա ցանքատարածություների 25.300 հա ավելացումը»,-նշեց նախարարը: