Վառելիքը չի համապատասխանել տեխնիկական նորմերին

ՀՀ էկոնոմիկայի նախարարության Շուկայի վերահսկողության պետական տեսչության կողմից վերջին մեկ տարվա ընթացքում իրականացվել են ստուգումներ 7 տնտեսավարող սուբյեկտներում (թվով 80 բենզալցակայաններում): 2011թ. ընթացքում ստուգում է իրականացվել 4 տնտեսավարող սուբյեկտներում:

Նավթամթերք ներմուծող և իրացնող տնտեսավարող սուբյեկտներից միայն մեկի մոտ խախտումներ չեն հայտնաբերվել: Մեկ տնտեսավարող սուբյեկտի մոտ բենզալցակայանի բաշխիչ պոմպասյան վրա բացակայել է բենզինի մակնշումը: Տրվել է իրացումը կասեցնելու մասին կարգադրագիր մինչև խախտման վերացումը: Տնտեսավարող սուբյեկտի ղեկավարը ենթարկվել է վարչական տուգանքի (100.000 դրամի չափով):

Մյուս երկու տնտեսավարող սուբյեկտների մոտ հայտնաբերվել են տեխնիկական կանոնակարգի պահանջների խախտումներ, մասնավորապես՝ չեն համապատասխանել օկտանային թվերի ցուցանիշները: Տրվել է իրացումը կասեցնելու մասին կարգադրագրեր մինչև խախտումների վերացումը և նշանակվել է տուգանք (յուրաքանչյուրը 100.000 դրամի չափով): Մնացած երեք տնտեսավարող սուբյեկտների մոտ (78 բենզալցակայանում) իրականացված ստուգումների արդյունքում թվով 77 բենզալցակայանում հայտնաբերվել են խախտումներ, այդ թվում' ավտովառելիքը իրացվել է առանց համապատասխանության սերտիֆիկատի և հայերեն լեզվով մակնշման, իրացվող ավտովառելիքը չի համապատասխանում տեխնիկական կանոկարգի պահանջներին, բաշխիչ պոմպասյուների ցուցմունքները թույլատրելի սխալանքի տիրույթում չեն եղել: Տրվել են իրացումը կասեցնելու և չափման միջոցների շահագործումը արգելելու մասին կարգադրագրեր, մինչև խախտումների վերացումը և պատասխանատու անձանց նկատմամբ կիրառվել են վարչական տուգանքներ: Մի դեպքում տնտեսավարող սուբյեկտը ենթարկվել է վարչական տուգանքի 1300000 դրամի չափով, մյուս դեպքում՝ 1000000 դրամի չափով: