Գյուղատնտեսության նախարան ամփոփեց կիսամյակը

Այսօր ՀՀ կառավարության հերթական նիստից հետո ՀՀ գյուղատնտեսության նախարար Սերգո Կարապետյանը լրագրողներին է ներկայացրել առաջին կիսամյակում ոլորտում արձանագրված արդյունքները: Նա նշել է, որ գյուղատնտեսության դրական տեղաշարժերը տարեվերջին 8-9% տնտեսական աճ են խոստանում: Ըստ նախարարի՝ առաջին կիսամյակում գյուղատնտեսական արտադրանքը կազմել է 203.6 մլրդ դրամ, որը նախորդ տարվա համեմատ 8.1%-ով ավելի է:

Բուսաբուծության ոլորտում աճը 28% է, անասնապահության ոլորտում' 2%, ձկնաբուծությունում՝ 25.2%:

Հատկապես լուրջ հաջողություններ կան ծիրանի արտադրության ոլորտում: Արդեն իսկ արտահանվել է 12.3 հազ. տոննա ծիրան՝ նախորդ տարվա 7300 տոննայի համեմատ: Իսկ ծիրանի բերքահավաքը կշարունակվի ևս 10-15 օր: Մթերող տեղական կազմակերպությունները նախորդ ողջ տարվա 2830 տոննայի փոխարեն այս տարի արդեն իսկ 6150 տոննա ծիրան են մթերել:

Սպասվում է նաեւ խաղողի, դեղձի եւ խնձորի բարձր բերք: Սակայն որոշակի խնդիրներ կան հացահատիկային մշակաբույսերի առումով՝ հա-ի բերքատվությունը կնվազի, սակայն համախառն բերքը կմնա բարձր 4-5%-ով, քանի որ, ընթացիկ տարում 22 հազ. հա –ով ավելի ցանք է կատարվել: