ՀՀ առևտրային բանկերի 2012-2014 թթ կանխատեսումները

2012-2014 թվականների համար ՀՀ բանկերն առանձնացրել են արտաքին միջավայրի, ներքին տնտեսության և ֆինանսական հատվածի այն գործոնները, որոնք ամենամեծ ազդեցությունը կարող են ունենալ իրենց գործունեության վրա:

Միջազգային շուկայում առանձնացվել է ճգնաժամի նոր ալիքի հնարավորությունը, երբ միջազգային ֆինանսական շուկաներում շարունակվող իրացվելիության ճգնաժամը կարող է բանկերի համար դժվարություններ ստեղծել նոր ֆինանսական ռեսուրսների ներգրավման տեսանկյունից: Հաջորդ կանխատեսումը վերաբերում է համաշխարհային տնտեսական աճին: Ըստ ՀՀ բանկերի կանխատեսման, 2012-2014 թվականներին ՀՀ հիմնական առևտրային գործընկեր երկրների տնտեսություններում կդրսևորվեն կայուն, սակայն դանդաղ աճի միտումներ: Բանկերի կանխատեսումներով, ոսկու և պղնձի շուկաներում մոտակա տարիներին գների անկում չի սպասվում: Որոշակի անորոշություններ կան և կշարունակվեն նավթի գների շուրջ:

Միջազգային շուկաներում տոկոսադրույքի քաղաքականության վերաբերյալ ՀՀ բանկերը միակարծիք չեն՝ մի մասը կանխատեսում է, որ միջազգային շուկաներում շարունակվող ցածր տոկոսադրույքի քաղաքականությունը կշարունակվի և երկակի ազդեցություն կունենա բանկային գործունեության վրա. մի կողմից՝ բանկերին հնարավորություն կտրվի ներգրավել էժան դրամական միջոցներ, մյուս կողմից՝ կարող է բացասական ազդեցություն ունենալ բանկերի տոկոսային եկամտի մակարդակի վրա՝ լողացող տոկոսադրույքով միջոցներ տեղաբաշխելիս: Բանկերի մյուս մասը կանխատեսում է տոկոսադրույքի դանդաղ, սակայն աստիճանական բարձրացում:

ՀՀ տնտեսությունում առանձնացվել է տնտեսական աճի գործոնը: 2012-2014 թվականներին կանխատեսվում է մակրոտնտեսական ցուցանիշների ընդհանուր բարելավում, աճ տնտեսության գրեթե բոլոր ճյուղերում: Սպասվում է, որ տնտեսական աճի վերականգնումը դրական ազդեցություն կունենա Ռուսաստանից Հայաստան ուղղվող մասնավոր փոխանցումների ծավալի վրա, սակայն կան բանկեր, որոնց կանխատեսումներով ակնկալվում է մասնավոր տրանսֆերտների տեմպերի նվազում:

ՀՀ առևտրային բանկերը կանխատեսել են նաև տնտեսության ստվերային հատվածի աստիճանական նվազում, ինչը ենթադրում է բանկային հատվածով անցնող գործարքների աճ:

Ֆինանսաբանկային հատվածում 2012-2014 թվականներին ՀՀ տնտեսության աշխուժացման արդյունքում կանխատեսվում է վարկերի տրամադրման աճ: Որոշ բանկերի կանխատեսումներով ապագայի անորոշությունները և բնակչության եկամուտների աճի տեմպի հնարավոր նվազումը կարող է հանգեցնել բանկերի կողմից ներգրավված ավանդների աճի տեմպերի նվազմանը:

Ըստ կանխատեսումների, 2012-2014 թվականներին ՀՀ առևտրային բանկերի միջև կխորանա մրցակցությունը մասնավորապես ժամանակակից հեռահար սպասարկման բանկային ծառայությունների գծով: Որոշ բանկեր հավանական են համարում ՀՀ-ում բանկերի հետագա միացումները: