Տեղական ինքնակառավարման մարմինների հետ համագործակցությունը խիստ կարևոր է. Գեորգի Ավետիսյան

Մսի շուկայի կարգավորմանը, սպանդանոցային մորթի անցմանն ու անասնահամաճարակային իրավիճակի վերահսկման արդյունավետության բարձրացմանն էր ուղղված ՀՀ ԿԵ սննդամթերքի անվտանգության տեսչական մարմնի ղեկավար Գեորգի Ավետիսյանի հանդիպումը Սյունիքի մարզպետ Հունան Պողոսյանի և մարզի համայնքային ղեկավարների հետ: Մասնակցել են նաև մարզում գործող և կառուցվող սպանդանոցների ներկյացուցիչները:

Հանդիպում-խորհրդակցության ընթացքում քննարկվել են Հայաստանում գյուղատնտեսական կենդանիների շարժի վերահսկման մեխանիզմների՝ կենդանիների նույնականացման և համարակալման համակարգի ներդրման անհրաժեշտությունը, սպանդանոցային մորթի անցնելու նպատակն ու ժամկետները, անսանաբույժների աշխատանքի կարևորությունը և այլն:

Գեորգի Ավետիսյանը տեղեկացրել է, որ անասնաբուժության ոլորտում համալիր փոփոխությունները սկսվել են թարմ մսի շուկաների հետևողական վերահսկողությունից, որի արդյունքներն արդեն ակնհայտ են. հանրապետության գրեթե բոլոր շուկաներն ապահովվել են սանիտարահիգիենիկ համապատասխան պայմաններով: «Անցումը պարտադիր սպանդանոցային մորթի մեր երկրի համար առաջնահերթություն է, որը մսի անվտանգության վերահսկողության ավելի լայն հնարավորություններ է ընձեռում՝ թույլ տալով, հետագծելիության սկզբունքով, վերահսկել մսի շուկայահանման ողջ շղթան: Այդ գործընթացում մեզ համար սկզբունքային և շատ կարևոր է տեղական ինքնակառավարման մարմինների հետ արդյունավետ, փոխշահավետ համագործակցությունը»,- ասել է ՍԱՏՄ ղեկավարը:

Սյունիքի մարզպետ Հունան Պողոսյանը հորդորել է համայնքների ներկայացուցիչներին լինել պատրաստակամ և համագործակցել ՍԱՏՄ Սյունիքի մարզային կառույցի և համայնքային անասնաբույժների հետ, արագ տեղեկացնել հնարավոր հիվանդությունների մասին, փորձել վերահսկել կենդանիների շարժը՝ պահանջելով անասնաբուժական 1-ին ձևը:

ՍԱՏՄ ղեկավարի տեղակալ Նարեկ Հայրապետյանը մասնակիցներին տեղեկացրել է, որ Սյունիքի մարզում գործող և արդեն կառուցվող սպանդանոցները կարող են բավարարել մարզի պահանջարկը, այնպես որ՝ գործընթացն անշրջելի է և, ինչպես արդեն հայտարարվել է, 2020թ. հունվարի 15-ից թարմ մսի սպանադանոցային ծագումը պարտադիր կլինի սննդի շղթայի բոլոր օպերատորների համար:

Արցախի՝ Սյունիքի մարզին հարող Աղավնատուն գյուղում ՍԱՏՄ ղեկավարությունը հանդիպում է ունեցել նաև Արցախի ՍԱՊԾ պետ Արթուր Ներսիսյանի հետ: Նպատակը գյուղատնտեսական կենդանիների չվերահսկվող շարժի հետ կապված խնդիրներն էին: Երկուստեք կարևորվել են երկու հանրապետություններում սննդամթերքի անվտանգության ոլորտում ծրագրերն ու միջոցառումները զուգահեռ իրականացնելու անհրաժեշտությունը, կենդանիների համարակալման, կենդանիների շարժի ավելի ակտիվ վերահսկման ու համաճարակային քարտեզի ձևավորման խնդիրները:

Սիսիան քաղաքի թարմ մսի իրացման տաղավարներում կատարված շրջայցի ընթացքում Գեորգի Ավետիսյանը տնտեսավարողներին հորդորել պահպանել մսի և ենթամթերքի շուկայահանմանը ներկայացվող անասնաբուժասանիտարական անվտանգության և հիգիենիկ բոլոր պահանջները, քայլեր ձեռնարկել սպանդանոցային ծագման միս ձեռք բերելու համար: «Փողոցում, առանց վերահսկողության, առանց անասնաբուժասանիտարական փորձաքննության մսի վաճառքը պետք է բացառվի և դա ապահովելու համար մենք գործադրելու ենք օրենսդրությամբ մեզ վերապահված հսկողության բոլոր մեխանիզմները»,- շեշտել է Գ. Ավետիսյանը: