2011-2012 թթ. ապրանքների արտահանման ծավալների մեծ փոփոխություն է արձանագրվել

ՀՀ Մաքսային ծառայության կողմից հրապարակված 2012թ.-ի առաջին կիսամյակում ՀՀ-ից արտահանված առավել բարձր մաքսային արժեք ունեցող ապրանքների ցանկը նախորդ տարվա նույն ժամանակաշրջանի հետ համեմատելով՝ պարզ է դառնում, որ որոշ ապրանքների արտահանման ծավալները զգալի տարբերություններ են արձանագրել: Ստորև ներկայացնում ենք մաքսային առավել բարձր արժեք ունեցող և արտահանման ծավալների ամենամեծ տարբերություն ցուցաբերած ապրանքների առաջին տասնյակը.

1. «Համակարգիչներ և դրանց բլոկներ» ապրանքախումբ՝ 2011թ.- ի 161-ի համեմատ, այս տարվա առաջին կիսամյակում արտահանման ծավալներն ավելացել են 14 անգամ՝ կազմելով 2,329 հատ,
2. «Փոստային նամականիշ, պետտուրքի և զինանշանի թուղթ, բաժնեթղթեր, արժեթղթեր» ապրանքախումբ՝ 2011թ.-ի 5.2 կգ-ի համեմատ, 2012թ.-ին ավելացել են 6.5 անգամ (34.2 կգ),
3. «Ժամացույցի կորպուսներ և դրանց մասեր» ապրանքախումբ՝ 2011թ.-ի 1,900-ի համեմատ, 2012թ.-ին ավելացել են 6.1 անգամ (մոտ 11,800),
4. «Բնական և հեղուկ գազ» ապրանքախումբ՝ 2011թ.-ի 45,040 հազ.-ի համեմատ, 2012թ.-ին նվազել են 4.01 անգամ (11,212.5 հազ.),
5. «Սիգար, սիգարիլլա, սիգարետ» ապրանքախումբ՝ 2011թ.-ի 424.2 մլն. հատի համեմատ, 2012թ.-ին ավելացել են 2.8 անգամ (1,198,4 մլն հատ),
6. «Թարմ կամ պաղեցրած ձուկ» ապրանքախումբ՝ 2011թ.-ի 164.8 տ. համեմատ, 2012թ.-ին ավելացել են 2.7 անգամ (447 տոննա),
7. «Էթիլային սպիրտ, սպիրտային թուրմ, լիկյոր և այլ սպիրտային ըմպելիքներ» ապրանքախումբ՝ 2011թ.-ի 3,803.4 հազ. լիտրի համեմատ, 2012թ.-ին ավելացել են 1.9 անգամ (78,340.6 հազ. լիտր),
8. «Ծիրան, բալ, կեռաս, դեղձ, նեկտարին, սալոր, մամուխ» ապրանքախումբ՝ 2011թ.-ի 3,771.9 տ.-ի համեմատ, 2012 թ.-ին ավելացել են 1.8 անգամ (7,236.7 տ.),
9. «Ցեմենտ» ապրանքախումբ՝ 2011թ.-ի 24,902.1 տ.-ի համեմատ, 2012թ.-ին ավելացել են 1.8 անգամ (46,232.8 տ.),
10. «Այլ բանջարեղեն պահածոյացված ոչ քացախով՝ չսառեցված» ապրանքախումբ՝ 2011թ.-ի 529.3 տ.-ի համեմատ, 2012թ.-ին ավելացել են 1.6 անգամ (878.6 տ.)։