Ճանապարհաշինարարական հարցերի քննարկում ՏԿՆ-ում

Հայաստանի Հանրապետության տրանսպորտի եւ կապի նախարար Գագիկ Բեգլարյանի մոտ օգոստոսի 1-ին տեղի է ունեցել աշխատանքային խորհրդակցություն ճանապարհաշինարարական խորհրդի անդամների հետ:

Նիստի ընթացքում քննարկվել են հարցեր, որոնք առնչվում են Հյուսիս-հարավ ճանապարահատվածի՝ դեպի հարավ գնացող ուղղությանը՝ դժվարանցանելի տեղամասերի շրջանցում, ճանապարհի կարգի ընտրություն, հետագա շինարարություն, եւ այլն:

Գագիկ Բեգլարյանը առաջնային է համարել ճանապարհների որակի եւ անվտանգության պահպանումը, ինչպես նաեւ կարեւորել առանցքային մեծ բեռնվածք ունեցող ավտոմոբիլների կողմից ճանապարհներին հասցվող վնասների փոխհատուցման օրենսդրական կարգավորումը: Նա հանձարարել է ներկայացնել առաջարկությունների փաթեթ, որոնք կնպաստեն ճանապարհներին ծանր մեքենաների քաշն արգելող օրենքում փոփոխություններ կատարելուն: Նախարարը մասնավորապես ասել է. «Մեզ համար կարեւորը ճանապարհների որակն ու անվտանգությունը պահպանելն է: Մենք մեծ վնաս ենք հասցնում մեր տնտեսությանը, եթե ամեն տարի նույն ճանապարհի վրա գումարներ ենք ծախսում»:

Խորհրդակցության ընթացքում նախարարը կարեւորել է ճանապարհների վերակառուցման ժամանակ տարվող քաղաքականությունը, որը վերաբերում է նոր հիմքերի տեղադրմանը, ծածկի կառուցվածքին, օգտագործվող նյութերի որակին, ժամանակակից տեխնոլոգիաների կիրառմանը, եւ այլն:

Նախարարը հանձնարարել է կարճ ժամանակում մշակել ճանապարհաշինության ոլորտին վերաբերող ընդհանուր քաղաքականության մեխանիզմներ և դրանց մեջ ներառել ճանապարհների որակը խաթարող յուրաքանչյուր տարր,ինչը հնարավորություն կտա միջազգային կառույցների հետ աշխատելիս ունենալ հստակ մոտեցումներ եւ ռազմավարություն:

Ճանապարհային նախագծման եւ կառավարման ժամանակ Գագիկ Բեգլարյանը նշել է,որ պետք է գերակայող դարձնել ճանապարհից օգտվողների պահանջների բավարարումը: Նիստի ընթացքում քննարկվել են նաեւ ճանապարհների նախագծման, շինարարության, հեռանկարային զարգացման հարցեր: