Արայիկ Հարությունյանը պետք է հեռանա․ դոցենտ (տեսանյութ)

ՀՅԴ երիտասարդական միության ԿԳՄՍ նախարար Արայիկ Հարությունյանի դեմ իրականացվող բողոքի ակցիային, բացի ԵՊՀ մի շարք ուսանողներից, միացել էին նաև դասախոսներ այլ համալսարաններից: Իր տեսակետով լրագրողների հետ կիսվեց Հայաստանի տնտեսագիտական համալսարանի դասախոս, դոցենտ Սուրեն Պարսյանը: Նա ցույցի մյուս մասնակիցների պես պահանջում է Արայիկ Հարությունյանի հրաժարականը:

«Ես միացել եմ այս պայքարին հայկական կրթություն, հայոց պատմություն կարգախոսով: Շատ կարևոր են ինձ համար այս արժեքները: Այստեղ խնդիրը Արայիկ Հարությունյանի գործոնը չէ, Արայիկ Հարությունյանը կարող է ունենալ իր սեփական արժեհամակարգը, և ոչ ոք չի կարող նրան ոչինչ պարտադրել: Խնդիրն այն է, որ այդ արժեհամակարգը նա փորձում է պարտադրել մեզ՝ օգտագործելով կառավարությունն ու նախարարությունը: Այս առումով մենք ունենք խնդիր, մենք չենք ընդունում Արայիկ Հարությունյանի կողմից մշակված կրթական մշակութային այս քաղաքականությունը»,-ասաց Պարսյանը:

Տնտեսագետի պնդմամբ՝ գործող իշխանության մեջ կան բազմաթիվ մարդիկ, ովքեր չեն կիսում Արայիկ Հարությունյանի արժեհամակարգն ու նախագծերը. «Խնդիրը ազգային կրթության և մշակույթի օրակարգը հստակեցնելն է, իսկ դա Արայիկ Հարությունյանն անել չի կարող, և նա պետք է հեռանա»: 

Անդրադառնալով ԿԳՄՍ նախարարի՝ ԿԳ նախկին նախարար Լևոն Մկրտչյանին ուղղված քննադատությանը՝ Պարսյանն ասաց. «Լևոն Մկրտչյանի մասին խոսելով նա փորձում է շեղել հանրային ուշադրությունն իր վրայից: Լևոն Մկրտչյանը լավ թե վատ փակել է իր ժամանակաշրջանը, հիմա իրենց հերթն է, թող ներկայացնեն իրենց նախագծերը»: