Օգոստոսի 2-ից կվերանայվեն զինծառայողների դրամական օգնության և ՊՊԱ գումարների չափերը

Օգոստոսի 2-ից ուժի մեջ են զինծառայողների դրամական օգնության և պարտադիր պետական ապահովագրության գումարների' կառավարության որոշմամբ վերանայված չափերը: Ըստ այդմ, զինվորական ծառայությունից սահմանված կարգով արձակվելու դեպքում շարքային զինծառայողին կտրվի 10 հազար դրամի չափով դրամական օգնություն, իսկ երկկողմանի ծնողազուրկ (որբ) շարքային զինծառայողներին' 200 հազար դրամ:

Ծառայողական պարտականությունները կատարելու ժամանակ զոհվելու (մահանալու) դեպքերից պարտադիր պետական ապահովագրության (ՊՊԱ) գումարների չափը սահմանվում է 455 հազար դրամ, իսկ ՀՀ պաշտպանության ժամանակ մարտական գործողությունների, մարտական հերթապահության և հատուկ առաջադրանք կատարելու ընթացքում զոհվելու (մահանալու) դեպքերից' 910 հազար դրամ: Նախկինում ՊՊԱ գումարների չափերը համապատասխանաբար սահմանված էին 367.5 հազար և 735 հազար դրամ: