4 հոգու մահվան պատճառ դարձած վարորդը փորձում էր ոստիկաններին ու քննիչներին մոլորեցնել

Հասարակություն 14 Նոյեմբեր, 2019 0:26

Այսօր Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի պետ Արտաշես Վանյանի որոշմամբ ստեղծված քննչական խմբի ղեկավար, նույն քննչական բաժնի հատկապես կարևոր գործերով ավագ քննիչ Գեղամ Գալստյանը միջնորդություն է ներկայացրել Երևան քաղաքի ընդհանուր իրավասության դատարան, որպեսզի դատարանը՝ որպես խափանման միջոց, երկամսյա կալանքի որոշում կայացնի Երևան քաղաքի Ռոստովյան փողոցի բնակիչ՝ 30-ամյա Էդմոնդ Բաղդասարյանի նկատմամբ, տեղեկացնում է Shamshyan.com–ը

Մնացական Մարտիրոսյանը, դռնփակ դատական նիստն անցկացնելուց և խորհրդակցական սենյակից վերադառնալով, բավարարել է քննիչի միջնորդությունը և Է. Բաղդասարյանը, ում նկատմամբ քրեական գործ է հարուցվել ՀՀ քր. օր-ի 242 հոդվածի 3-րդ մասի (ճանապարհատրանսպորտային պատահար, որն առաջացրել է 2 և ավելի մարդու մահ) և 333 հոդվածի (սուտ մատնություն) հատկանիշներով, կալանավորվեց և տեղափոխվեց «Արմավիր» քրեակատարողական հիմնարկ։

Է. Բաղդասարյանը 2018 թվականի դեկտեմբերի 29-ին ավտովթարի հետևանքով մարմնական վնասվածքներ էր ստացել և տեղափոխվել հիվանդանոց։ Այդ վթարի հետևանքով 4 հոգի մահացել էին։ Վթարից հետո Է. Բաղդասարյանը ոստիկաններին ու քննիչներին հայտնել էր, որ ինքը եղել է ուղևոր և սուտ մատնությամբ իսկական ուղևորին ներկայացրել էր որպես վարորդ, մինչդեռ ոստիկանությունն ու քննչական բաժինը հսկայածավալ, բազմակողմանի օպերատիվ-հետախուզակ և քննչական գործողությունների արդյունքում հիմնավորել էին, որ նա ստել է և ողբերգական վթարի մեղքը գցել է իր ավտոմեքենայի մեջ եղած ուղևորի վրա ու այսօր արդեն հիմնավոր փաստերով դիմել էին դատարան։