Սոցիալական խնդիրները եղել են կառավարության նիստի ուշադրության կենտրոնում

Երեկ՝ օգոստոսի 2-ին տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը: ՀՀ ֆինանսների նախարարի՝ 2012թ.-ի առաջին յոթ ամիսների մակրոտնտեսական ցուցանիշները ներկայացնելուց հետո Տ. Սարգսյանը նշել է, որ արձանագրված ցուցանիշները հուսադրող են:Օրակարգի ուշադրության կենտրոնում են եղել ՀՀ սոցիալական խնդիրները:

ՀՀ կառավարությունը որոշել է ստեղծել «Սոցիալական բնակարանային ֆոնդի սպասարկման կենտրոն» պետական ոչ առևտրային կազմակերպություն։ ՀՀ աշխատանքի և սոցիալական հարցերի նախարարության ենթակայությամբ նորաստեղծ կազմակերպությունը կիրականացնի նախարարությանը հանձնված սոցիալական բնակարանների պահպանման, շահագործման, սոցիալական բնակարանային ֆոնդում ներառված շենքերում բնակվելու իրավունք ունեցող անձանց' սոցիալ-հոգեբանական օգնության, առաջնային բուժօգնության, իրավունքների և շահերի պաշտպանության ծառայությունների մատուցումը։ Շիրակի մարզի Մարալիկ քաղաքում սոցիալական տան կազմակերպական և ծառայությունների մատուցման ծախսերի համար հատկացվել է 11,388,400 ՀՀ դրամ։

Իր խոսքում Տ. Սարգսյանը ասել է. «Պետք է շնորհակալություն հայտնենք բոլոր հասարակական կազմակերպություններին, որոնք մեզ հետ աշխատել են և Հայ օգնության միությանը, որը մեր նախարարության հետ միասին հստակեցրել է ծնողազուրկ երեխաների ցուցակները, ում այսօր պետությունն ապահովում է բնակարաններով, և ըստ էության այս որոշումով մենք արմատական փոփոխություն ենք կատարում այդ բնագավառում, որովհետև այս ծրագիրն արդեն սկսում է տալ առաջին արդյունքները։ Մի կողմից' մենք ունենալու ենք պատասխանատու մարմին, ի դեմս նախարարության կողմից ստեղծված նոր ձեռնարկության, որն ամբողջությամբ կոորդինացնելու է այդ աշխատանքները և սոցիալական բնակարանային ֆոնդի շահագործման հետ կապված խնդիրները, մյուս կողմից էլ' արդեն այն բնակարանները, որոնք հանձնվել են նախարարությանը, արդեն հնարավոր կլինի տրամադրել երեխաներին, ովքեր երկար ժամանակ է' սպասում են այդ բնակարաններին։ Մենք այս տարի և մյուս տարի ևս մի քանի շենք ստանալու ենք Մարալիկում, և 2 տարվա ընթացքում այս խնդիրն զգալիորեն կհաղթահարվի»:

ՀՀ կառավարությունը հավանություն է տվել Բնակչության ծերացման հետևանքներից բխող հիմնախնդիրների լուծման և տարեցների սոցիալական պաշտպանության Ռազմավարությանը և Ռազմավարության իրականացման 2012-2016թթ. գործողությունների ծրագրին։

Ընթացիկ տարվա բնակլիմայական պայմաններից ելնելով անհրաժեշտ փոփոխություններ են կատարվել ջրային համակարգերի կապիտալ վերանորոգումների ծրագրում, հրատապ լուծում պահանջող աշխատանքների ցանկում ընդգրկելով նոր օբյեկտներ, ինչը ոռոգում-ջրառ իրականացնող ընկերություններին հնարավորություն կտա ապահովել արդյունավետ ջրամատակարարում։ Սևան-

Հրազդան էներգետիկ-իրիգացիոն համակարգից սնվող հողատարածքների անխափան ոռոգումն ապահովելու նպատակով ՀՀ կառավարությունը ջրառի նախատեսված 204.0 մլն խորանարդ մետր ջրաքանակի փոխարեն սահմանել է 239.2 մլն խորանարդ մետր: