1.3 մլդ դրամ վճարելու ժամկետները հետաձգվել են

Տնտեսություն 4 Օգոստոս, 2012 16:10

«ՀՀ էկոնոմիկայի նախարարության առաջարկությամբ 2012թ. անցած ժամանակահատվածում ՀՀ կառավարության կողմից «Ժամանակավոր ներմուծում» մաքսային ռեժիմով ներմուծված ապրանքների ժամկետների երկարաձգման թույլտվություն են ստացել թվով 5 ընկերությունների 5 ծրագրեր»,- «Փաստինֆոյի» թղթակցին հայտնեցին ՀՀ էկոնոմիկայի նախարարության տեղեկատվության և հասարակության հետ կապերի բաժնից:

Տնտեսվարող համապատասխան սուբյեկտների նկատմամբ զիջման այս քաղաքականությունն իրականացվում է ՀՀ կառավարության 04.08.2011թ. N1119-Ն որոշմամբ հաստատված «Ժամանակավոր ներմուծում»/«Ժամանակավոր արտահանում» մաքսային ռեժիմներով ներմուծված/արտահանված ապրանքների համապատասխան ժամկետների երկարաձգման կարգի համաձայն:

Հիշեցնենք, որ այդ փաստաթղթով ՀՀ էկոնոմիկայի նախարարությունը, ՀՀ ֆինանսների նախարարությունը և ՀՀ կառավարությանն առընթեր պետական եկամուտների կոմիտեն գնահատում են տնտեսվարողի ներկայացրած ծրագիրը' հաշվի առնելով 10 չափորոշիչներ: Օրինակ, նման մոտեցման համար մինչև 300 մլն դրամ արժողությամբ ապրանքներ ներմուծող կազմակերպության ծրագիրը պետք է աչքի ընկնի իրատեսականությամբ և հեռանկարայնությամբ, տնտեսության վրա մուլտիկլիպատիվ ազդեցությամբ, զբաղվածության ծավալի ավելացման որոշակի ներուժով և այլն:

Ընթացիկ տարվա անցած ժամանակահատվածում ՀՀ կառավարության հաստատած կարգի ընձեռած հնարավորություններից օգտված ձեռնարկություններն են «ՎԿՍ Արմենիա» ՍՊԸ-ն, «Լուսակերտ Բիոգազ Փլանթ» ՓԲԸ-ն, «Արարատ Գրուպ» ՍՊԸ-ն, «Բարձրավոլտ էլեկտրացանցեր» ՓԲԸ-ն, «Եղվարդի մարզակոշիկների ֆաբրիկա» ԲԲԸ-ն:

Նշենք, որ այս ընկերությունների համար ընդհանուր առմամբ հետաձգվել են Հայաստան ներկրված տարբեր ապրանքների դիմաց 1,3 մլրդ դրամ մաքսային և ԱԱՀ վճարումներ կատարելու ժամկետները: