ՀՀ գլխավոր դատախազությունում քննարկվել են էլեկտրոնային արդարադատության ներդրման խնդիրները

ՀՀ գլխավոր դատախազի տեղակալ Արմեն Հարությունյանն ընդունել է ՄԱԿ-ի զարգացման ծրագրերի (ՄԱԶԾ) փորձագետների խմբին: Այս մասին հայտնեցին ՀՀ գլխավոր դատախազության հանրային կապերի բաժնից:

Հանդիպման ընթացքում քննարկվել են հանրային հատվածի արդիականացման ծրագրի շրջանակներում իրականացվող՝ էլեկտրոնային արդարադատության համակարգի ներդրման, քրեական դատավարության թվայնացման գործընթացը, կիրառվելիք մոդելները, միասնական համակարգի ներդրման դեպքում առաջացող հնարավոր խնդիրները, քրեական դատավարության մասնակիցներին էլեկտրոնային արդարադատության գործիքներից օգտվելու հնարավորության ընձեռումը:

Ողջունելով հյուրերին՝ ՀՀ գլխավոր դատախազի տեղակալը նշել է, որ ՀՀ դատախազությունը ակտիվորեն ներգրավված է  քրեական արդարադատության համակարգի արդյունավետության բարձրացմանը միտված բարեփոխման գործընթացներում և կարևորում է միջազգային գործընկեր կազմակերպությունների հետ տարբեր ձևաչափերով հաստատված համագործակցությունը:

Ներկայացվել է նշված հարցերի կապակցությամբ Էլեկտրոնային արդարադատության միասնական համակարգի մշակումն ու ներդրումն ապահովող միջգերատեսչական հանձնաժողովի մոտեցումները, էլեկտրոնային արդարադատության տեսլականը, այդ ուղղությամբ արդեն իսկ իրականացված օրենսդրական և ինստիտուցիոնալ նախաձեռնությունները:

Արմեն Հարությունյանը նշել է, որ քրեական վարույթների իրականացվման էլեկտոնային համակարգի ներդրումը նախատեսված է իրագործել ՀՀ քրեական դատավարության նոր օրենսգրքի՝ արդեն նախանշված ընդունման գործընթացին զուգահեռ: Իսկ ներկայումս այդ նպատակով ուսումնասիրվում է տարբեր երկրների փորձը, միջոցներ են ձեռնարկվում առավել ընդգրկուն տեխնիկական առաջադրանքի մշակման ուղղությամբ:

Փորձագիտական խմբի անդամները կարևոր են համարել այդ գործընթացում հատկապես դատախազության ակտիվ նախաձեռնողական մասնակցությունը:

Էլեկտրոնային արդարադատության համակարգի արդյունավետության ապահովման տեսանկյունից նրանք ընդգծել են այնպիսի լուծումների ապահովումը, որոնք ներդաշնակություն և փոխշաղկապվածություն կապահովեն էլեկտրոնային հարթակում մինչդատական և դատական վարույթների միջև, ինչպես նաև կնպաստեն քրեական վարույթների օրինականության նկատմամբ հսկողության դյուրացմանն ու արդյունավետության բարձրացմանը:

Հանդիպման ընթացքում արծածվել են նաև գործընթացին մեթոդական և փորձագիտական աջակցության եղանակներին առնչվող այլ հարցեր: