Բժիշկները վերահսկում են հացադուլ իրականացնող կալանավորի առողջական վիճակը

ԱՆ «Քրեակատարողական բժշկության կենտրոն» ՊՈԱԿ-ի բժշկական անձնակազմն իրականացնում է ամենօրյա այցելություններ, որոնց ընթացքում կատարվում են կալանավոր, հացադուլ իրականացնող Վահե Մելոյանի ճնշման, սրտի զարկերի, ջերմության չափումներ և հացադուլավորի մարմնի քաշի կշռում: Այս մասին տեղեկացանք Արդարադատության նախարարության տեղեկատվության և հասարակայնության հետ կապերի վարչության պետ Լուսինե Մարտիրոսյանի Ֆեյսբուքի էջից:

«Դեկտեմբերի 25-ի տվյալներով՝ արձանագրվել է, որ Վ. Մելոյանն ունի 100/70 զարկերակային ճնշում, քաշը՝ 57 կգ: Վ. Մելոյանի մոտ առկա է ընդհանուր թուլություն: Նաև նշեմ, որ Վ. Մելոյանին պարբերաբար պարզաբանվել ու պարզաբանվում են հացադուլի պատճառով առաջացող բացասական հետևանքների, կանխատեսվելիք բարդությունների և բժշկական հետազոտության անհրաժեշտության մասին»,- գրել է Մարտիրոսյանը:

Ինչ վերաբերում է Վ. Մելոյանին առանց իր համաձայնության բժշկական օգնություն և սպասարկում տրամադրելուն, որը կարտահայտվի արհեստական սնուցման ձևով, Մարտիրոսյանը գրել է, որ բնակչության բժշկական օգնության և սպասարկման մասին» օրենքի 16-րդ հոդվածն ամրագրում է այն դեպքերը, երբ կարելի է սահմանափակել անձի ֆիզիկական անձեռնմխելիության իրավունքը:

«Մասնավորապես՝ նշյալ հոդվածն ամրագրում է առ այն, որ առանց մարդու կամ նրա օրինական ներկայացուցչի համաձայնության թույլատրվում է իրականացնել բժշկական օգնություն և սպասարկում մարդու կյանքին սպառնացող վտանգի, ինչպես նաև շրջապատի համար վտանգներ կայացնող հիվանդությունների դեպքերում` Հայաստանի Հանրապետության օրենսդրությամբ սահմանված կարգով: Փաստորեն, հաշվի առնելով բժիշկների՝ պացիենտների լավագույն շահերին համապատասխան գործելու պարտականությունը՝ օրենսդիրը, որպես ցուցիչ հիմք ընդունելով մարդու կյանքին և առողջությանն սպառնացող վտանգը, առանձնացրել է այն երկու դեպքը, երբ պետությունը, հավասարակշռելով բժշկական միջամտության դեպքում սպասվող արդյունքը և պացիենտի սեփական կարծիքը, թույլ է տալիս բժշկին ակտիվորեն գործել։

Հաշվի առնելով նշվածս և հիմքում ունենալով խնդրի վերաբերյալ միջազգային կազմակերպությունների, այդ թվում՝ կոնվենցիոն մեխանիզմների ներկայացրած դիրքորոշումները՝ ՀՀ կառավարության 2006 թվականի օգոստոսի 3-ի N 1543-Ն որոշմամբ ամրագրվել է, որ հացադուլ իրականացնող անձի գիտակցության մթագնման կամ կորստի, ինչպես նաև կոմայի մեջ ընկնելու դեպքում վերջինիս առանց իր համաձայնության տրամադրվում է անհրաժեշտ բժշկական օգնություն և սպասարկում (այդ թվում՝ արհեստական սնուցման ձևով) միայն կյանքին սպառնացող վտանգի, ինչպես նաև շրջապատի համար վտանգ ներկայացնող հիվանդությունների դեպքերում` Հայաստանի Հանրապետության օրենսդրությամբ սահմանված կարգով՝ բժշկի պատճառաբանված գրավոր եզրակացության հիման վրա: Բժշկական օգնությունը և սպասարկումը պետք է իրականացվեն մարդկային արժանապատվությունը չնվաստացնող պայմաններում՝ պահպանելով հացադուլ իրականացնող անձի հիմնական իրավունքները և ազատությունները: Միաժամանակ, շեշտադրվել է, որ հացադուլ իրականացնող անձի հարկադիր կերակրումն արգելվում է: